Марий Элым вуйлатыше Юрий Зайцев Андрей Кондратенколан кугыжаныш наградым кучыктен.
«За заслуги перед Марий Эл» орденын медальжым ончычсо ялозанлык да кочкыш сату министр Андрей Кондратенко пашаште кӱкшӧ лектышыш шумыжлан да республикнам социально-экономически вияҥдымашке кугу надырым пыштымыжлан налын.
Наградым кучыктышыжла, регион вуйлатыше Андрей Кондратенколан тыршен ыштымыжлан уло кумылын тауштен да ончыкыжым тудлан пашаштыже у сеҥымашыш шуаш тыланен.
– Тиде награде – элнан патриотшын шуко ий тыршен ыштымыжлан ак, тудо Марий Элым вияҥдымашке кугу надырым пыштен. Андрей Владимировичын вуйлатымыж почеш ялозанлык отрасль кугу ошкылым ыштен. Тидым регионнан аграрийже-влакат палемдат, – палемден Юрий Викторович.
Андрей Кондратенко министерствым 2021 ий шошым вуйлаташ тӱҥалын. Тудын вуйлатыме жапыште Марий Элын агропромышленный комплексше ятырлан кушкын да вияҥын. Ялозанлык сатум ыштен налше-влаклан полшаш виктаралтше кӱлешан проект, жаплан келшыше технологий-влак илышыш шыҥдаралтыныт, продукцийнан чытен лекме йӧнжӧ-влак кугемыныт.
Марий Элын ялозанлык да кочкыш сату министрже Андрей Кондратенко паша гыч шке кумылын каен.
Марий Элым вуйлатыше Юрий Зайцевын 2025 ий 15 октябрьысе 251-ше №-ан указше почеш Марий Элын ялозанлык да кочкыш сату министржылан Павел Валентинович Раевскийым шогалтыме.
Марий Элым вуйлатышын пресс-службыжын уверже негызеш Вячеслав Смоленцев ямдылен.
