Звенигово районлан – 100 ий
Юл воктене, Провой велне…
Провой вел маныт калыкыште ты районым. А йылмызе-влак тидым «паровой» мут дене кылдат, вет Юл эҥерын тысе иксаже (Звениге затон) пар вий дене коштшо судным шогалташ да олмыкташ пеш келшен толын. Санденак ты кӱлешлыклан ончыч изирак мастерскойым, вара заводым чоҥеныт. Тудым негызлымылан шушаш ийын 165 ий темеш.
А Звенигово муниципальный районлан тений – 100 ий. Тудын гербшым ончалыда гынат, корабль штурвалым ужын умыледа веле: ты символике районлан чынжымак лишыл. Эше тушто умла парча жапше годым ты кундемыште тиде ялозанлык культурым шуко ончен куштымо нерген ойла.
Мутат уке, жап эртыме семын илышыште кугу вашталтыш лийын. Мыняр озанлык пытен, мыняр предприятий нелылыкыш логалын. Но нунын коклаште нелылыкым сеҥен лекшат, угыч шочшат улыт. Районын лӱмгечыж вашеш таче когыньышт дене палыме лийын кертыда. Мутат уке, утларакышт дене палдарыме шуэш ыле, но шкенышт велым кумылышт ыш сите. Векат, куштылгынак огыт иле. Но кӧлан кызыт куштылго? Нине предприятийланат тӱрлӧ йӧным кычалашышт перна. Тӱҥжӧ – вуйым огыт саке. Тидак огыл мо кызыт мыланна кӱлеш. А лӱмгече идалык тек нунылан вийым пуа.
Ю.Исаковын фотожо.
