Сургутышто «Югран хрусталь короныжо – 2023» моторлык да усталык конкурс эртен.
Тушто шкенжым Пошкырт кундем Мишкан районысо Кӱрзе ялыште шочын-кушшо Вероника Алетдинова ончыктен да сеҥышыш лектын. Югран хрусталь короныжо лач тудлан логалын.
Кажне марий ӱдырын тыгай сынан конкурсышто сеҥымашыжтлан куанымак шуэш. Ну моторак улыт мемнан ӱдырна-влак, эше ушан, поро, сымыстарыше… Вероника, эсогыл, кум номинацийыште палемдалтын, иктыже – тӱҥ, вес кокытшо – ешартыш. «Эн сай национальный костюм» номинацийыште марий улмыжымат ончыкташ йӧнжӧ лийын. Да тыште тудо адакат сеҥышыш лектын. А вургемже дене Мишкан селасе тӱвыра пӧрт пашаеҥе-влак полшеныт.
«Ныжылгылыкын миссше» номинацийыштат тудым жюри палемден.
Вероника М.Акмулла лӱмеш Пошкырт кугыжаныш педагогике институтын дошкольный педагогике да психологий факультетшым тунем лектын. Бакалавриатым да магистратурым йошкар диплом дене пытарен. Изишак Уфаште илымеке, Сургут олаш куснен да йочасадыште воспитательлан ышташ тӱҥалын.
Моторлык да усталык конкурслан ӱдыр моло участник-влак дене пырля тылзе наре ямдылалтын. Иктешлыше касыште визиткым, усталык номерым, пайрем вургемым ончыктымо годым шкем тӱрыс почын пуаш кӱлын. Вероника марий вургемым чиен, марий сем почеш вӱдварам кучен лекмыжак, лывыла ийын кайымыже, кидшым таврватымыже мом шогат! Соцлаштыкыште ты видеом ончышым. А тыгодым экраныште марий калык йӱла дене палдарыше сӱрет-влак ончыкталтыныт.
«Кок ешартыш номинацийыште сеҥымашыже вучыдымо лийын гынат, но чонышто лач тушто ойыртемалтме шуын. Молан манаш гын, марий костюмым, марий ӱдырын образшым сайын ончыкташ манын, мый кок арня наре йӱд-кече тыршенам. Шочмо калыкемын моторлыкшым, поянлыкшым кӱлеш семын ончыктен кертынам, шонем», – палемда тудо шке лаштыкыштыже.
Сеҥыше семын Вероникалан тыгаяк конкурсыш Москош каяш темленыт, но тудо келшен огыл. Кызыт ӱдыр отпускышто, тудым шочмо ялыштыже эртара. Ончыкыжым сӱретлыме пашам умбакыже шуяш шона, молан манаш гын ты усталык кумылжо эре пеленжак. Ик ий ончыч практический психологлан тунем лекмыжымат арам ынеж ыште, тиде корно денак кайынеже. «Еҥ-шамычлан полшымо шукта», – каласыш Вероника.
С.Носова
Снимкыште: В.Алетдинова.
Фотом В.Алетдинован соцкыл лаштыкше гыч налме
