30 июльышто 13 шагатлан Йошкар-Оласе Марий паркыште пу гыч пӱчкедыше-влакын «Марий калыкын легендыже-влак» фестиваль почылтеш.
Тений фестиваль кокымшо гана эртаралтеш. Арня жапыште участник-влак ойырен налме скульптурым пӱчкедаш тӱҥалыт. Ты гана нуно марий талешке-влакын образыштым почын пуышаш улыт. А пашаштым кажне кумылан еҥ эскерен кертеш.
Фестивальын пытарыш кечынже 10 шагатлан эше ик конкурс лиеш, палемдыме жапыште участник-влак тематике дене келшыше скульптурым пӱчкеден ыштышаш улыт. Тура кечывалым жюри иктешлымашым ышта. А 19 шагатлан кастене паркын тӱҥ сценыштыже «Шӱдыр йӱр» марий концерт тӱҥалеш.
Снимкыште: кодшо ийын эртыше фестиваль годым ыштыме скульптур-влак таче Марий паркым сӧрастарат.
Светлана Носован фотожо.
