Подписке шотышто У Торъял районлан ответственный уламат, ты кундемыш шуэн огыл миен толаш логалеш. А тыге гын, эн ончычак корнын могай улмыжым ужат да шижат. Сай гын, ийын кайымыла гына кудал колтет. А лакылан гын, машинаште тӧрштыл шинчен ноет!
Йошкар-Ола-Шернур кугорно гыч У Торъял велыш савырнымеке шуйналтше корно нерген шукерте огыл веле возымем гай чучеш гынат, тиде 2020 ий майыштак лийын улмаш. Лач тунам тӱҥалтыште вурсен, вараже йывыртен серанам. Моланже раш, шонем. Тиде корно пӱтынь кужытыштыжо 22 километрыште, кунам тӱрыс сай лийын гын?! Такшым тунам указательыште 21 километр манын палемдыме ыле. А тений савыртыш гыч У Торъял марте 20 километр манын возалтын! Тушто нимо вашталтын огыл, но тудо кузе ий гыч ийыш кӱчыкемеш – ӧраш гына кодеш…
Тунам ты корно дене пушкыдо сиденян машинаште тарантас дене кудалме гай чучын манын возенам ыле. Но вараже тудым тӧрлатеныт. Ме уло кужытыш асфальтым шарат манын шоненна. Но ужашын-ужашын веле уэмденыт. Сандене арам тунам чот куанен-ӱшанен возенам улмаш.
А кызыт гын чыланат йывыртен кертына: ты кужыт корныш асфальтым ынде мучко шарат! Кодшо арнян У Торъял районыш командировкыш миенна ылят, 20 километр кужыт корнышто иканаште эсогыл ныл вере пашам ыштымым ужна. Ик тӱшка пашаеҥ-влак машина дене асфальтым эрыктат, мушкыт, вес вере посна ужаш корно гыч тошто шартышым веле огыл кораҥдат, а икмыняр метр келгытан лакымак ыштат ыле. Кумшо вере асфальтым опташ растворым йоктареныт, нылымшыште тудым шареныт.
Ты пашам кӧ виктарыме нерген корнын ик ужашыштыже поснак шукын улшо еҥ-шамыч деч йодна. «Теве тудын дене мутланен кертыда», – маньыч да кужу капан пӧръеҥ велыш ончыктышт. А тудыжо ты жапыште лач гына машинашке шинче да водительже дене Йошкар-Ола велыш кудалаш тарваныш. Жапыштыже толын шуынна улмаш. Машинам чарналтыктышна. Вуйлатыше тушеч лекте да, манмыла, мо, кушто, кунам сынан йодышем-влаклан вашештен, палдарыш.
– Тиде кужыт корным ыштымаште «Марий Эл Дорстрой» организацийын кум филиалже тырша. Иктыже – Медведево район гыч, – каласкалаш тӱҥале тудын вуйлатышыже Станислав Овчинников. – Эше кокыт Советский да У Торъял районла гыч улыт. Корным ыштымаште кызыт чылаже 40 наре еҥ тырша. Тышеч У Торъялысе филиал гыч 12-15 нарын улыт.
Ойлымо почеш, ямдылалтме пашам 18 июльышто тӱҥалыныт. Ты сомылым У Торъялысе филиал шуктен. Изиш варарак корным шотыш кондымо пашам шукташ тӱҥалмашке моло кок район гычат толыныт.
Пӱтынь кужытыш асфальтым августышто шарен шуктышаш улыт.
– Тылеч вара корно тӱрым шотыш кондаш, разметкым, тӱрлӧ палым, знакым, вераҥдаш тӱҥалына, вӱд пуч-влакым ачалена. Пашам тӱрысшӧ октябрьыште мучашлаш палемдалтеш, – палдарыш пытартышлан С.Овчинников.
Мемнан мийыме кечын Йошкар-Ола-Шернур кугорно гыч У Торъял велыш савырнымеке шуйналтше корнын ик километр утларак ужашышкыже у асфальтым шареныт ыле. Тыгак У Торъял гыч Шемермучашым эрталтымешке ик велныже тӱрыс, а весыштыже изиш шагалрак ыштыме лийын.
Мом ойлаш, у шартыш – уак. Лӱҥгалтен гына кудал колтет! Вашке 20 (ала 22?) километр кужытан ты корно ындежым мучкак тыгай тӧр лиеш манын, ӱшанаш чыла амал улыла чучеш…
Любовь Камалетдинова
М.Скобелевын фотожо
