«Марий Эл» газет полшымо дене республикыште илыше калыклан поро кумылым, пеҥгыде тазалыкым тыланем да ик айдемылан тау мутым каласем. Ты шотышто виянжак омыл, сандене утыжым ида вурсо. Тыге…
Лӱмем – Равиля. Пенсионер, инвалид, кова улам. Кумда элнан мотор ик кумдыкшын пӱрымашыжым саемдаш полшышо ик айдемылан нимучашдымын тауштынем ыле. Тений августышто Марий Эл вуйлатышын пашажым шуктышо Александр Евстифеев рӱдоласе олмыктымо да ачалаш тӱҥалме икмыняр корным тергыш. Ала-могай Юмыжо тудым Шернур трактышкат, лачшымак мемнан илыме шуко орлыкан пӧртна воктекат, кондыш! Мый тушто уныкам-шамыч дене коштам ыле. Тыгай пиал дене пайдаланен, Александр Александровичлан шке правана верч кужу жап шогымынам, канализаций, корно да моло дене кылдалтше неле деч неле йодыш-влакым шкеак решатлаш тыршымынам, манмыла, шортын-шортын каласкалышым. Пӧртна гыч йочасад, школ, кевыт марте ошкылаш неле да йӧндымӧ веле огыл, эсогыл лӱдыкшӧ. Йошкар-Ола администраций мемнан илышна да тазалыкна шотышто мутым кучаш тореш лийын, пуйто ме йӧршын йӧрдымӧ, кундемланна кӱлдымӧ улына. Корныеҥлан тротуарым келыштарыме, автобус остановкым шогалтыме, кугорно гоч вончаш устройствым ыштыме шотышто кок суд процессым сеҥенна гынат, ола администраций нимом шотыш налын огыл. Корнышто нимогай вашталтыш лийын огыл. Александр Александрович тунамак Йошкар-Олан мэржылан чыла тидым ышташ кӱштыш. Ода ӱшане, очыни, но кум кече гыч кугорно воктенсе кумдыкым тротуарлан эрыкташ тӱҥальыч! Корным тымарте мыняр гана олмыктымо гын, тротуар нерген ик мутымат лукмо огыл. Кызыт тиде паша мучашке лишемеш. Коляскан самырык ава-влакат, тоям тоялен ошкылшо илалше еҥ-шамычат кугорным корныеҥлан лӱмын ойырымо верыште ласкан вончат, йоча-влакат садикыш ма школыш свежа тротуар дене куанен коштыт.
Александр Александрович, кугу тау тыланда! Пӧртыштына – улыжат 16 пачер, но воктенна эше икмыняр пӧрт, организаций улыт, тушто шуко калык ила, пашам ышта. Ӱшанем, тыгай кӱлешан пашам шуктымыланда чыланат уло шӱм-чон дене тауштат. Тӱткышдам ужын, мемнам пагалымыдам, олан, республикын да элын гражданинже улмынам шижына. Мыланна тиде моткоч кӱлешан. Республикыштына полышым йодаш лийме еҥ-влак ешаралтмат куандара. Таза лийза, Александр Александрович!
Шернур тракт уремысе пӧртлаште илыше-влак лӱм дене Равиля Валиева.
