Пагалыме йолташ-влак! Шкат паледа, илыш эре икшырымын сайын да веселан огеш эрте. Айдемылан, шоныдымын-вучыдымын, кугу азап ден ойгымат ужаш логалеш. Тыгай годым лишыл еҥын ÿшанле туп-вачыже, полыш кидше шергакан.
Таче республикыштына илыше ик марий ешлан окса полыш моткочак кÿлеш. Ача ден ава индеш ияш Ярослав эргыштын илышыж верч ынде кум ий лым лийде кучедалыт. Российыште мом ышташ лиеш гын, чыла эртеныт. Рвезым Израильысе Хаим Шиба лÿмеш медицине рÿдер эмлаш налаш келшен, но тидлан пеш шуко оксам йодын. Марий еш тыгай суммым шке семынже нигунамат поген огеш ситаре, а Ярославлан полыш кызытак кÿлеш.
Я.Яковлевын диагнозшо, тымарте эмлалтмыж нерген https://vk.com/topic-213470512_48699811 адрес дене пален налаш леш. Кöн интернет дене кылже уке гын, рвезын Людмила аважын каласкалымыжым лудаш темлена:
– Ярослав черын шучкылыкшо нерген огеш пале. Рашемденрак ойлаш гын, шкенжым черлылан огеш шотло, а тазалыкше дене кылдалтше тÿрлö ситыдымаш иммунитетым пеҥгыдемдаш кÿлеш манын шона.
2019 ий апрель марте эргына моло икшыве семынак илен: йочасадыш коштын, бассейныште ийын, школыш тунемаш каяш ямдылалтын, йолташыже-влак дене модын… Но ик кечын тудо пулвуйжо корштымылан, капкылже утыждене ырымылан вуйым шие. Педиатр кылмен черланыме деч эмлаш темлыш, а пулвуйжо кугу температурлан кöра тургыжландара манын лыпландарыш. Чер писын чакныш, но ик арня гыч угыч пöртыльö. Ты гана Ярослав вачыже корштымылан вуйым шие. Шочшынам ортопед ден ревматолог ончышт, но нимогай ситыдымашым ышт рашемде. Адакше корштымо угыч писын эртыш. Но эргынан шапалгыше чурийже чевер тÿсым ыш нал, тылеч посна куатше пытымым шижаш тÿҥална. Вÿржым тергымеке, медик-влак гемоглобин ден лейкоцитын нормо деч шагалрак улмыштым рашемденыт. Тыгайже ОРЗ дене черланыме деч вара лиеда маньыч. Но эше кок арня гыч вÿрын анализше икымше бласт-влакын улмыштым ончыктеныт…
Ярославым тиде кечынак Лелия Ивановна Соколова лÿмеш Йошкар-Оласе йоча больницын онкогематологий отделенийышкыже эмлалташ пыштышт. Тымарте эргына больницыште ик ганат киен огыл, а мылам тудын пÿсö (лимфобластный) лейкоз дене черланымыж нерген каласышт.
Май гыч декабрь марте Ярослав палемдыме химиотерапий курсым шучко сар ваштареш лÿддымын шогалтше патыр воин семын эртыш. Да мемнам у 2020 ий вашеш мöҥгö колтышт.
Тылеч вара эше кок ий жапын-жапын тазалыкым пеҥгыдемдыме химиотерапийым эртышна, арня еда анализым сдатлышна, темлыме препаратым йÿна…
2022 ий январь тÿҥалтыште черетан медицине шымлымашым эртыме годым врач-влак черын пöртылмыжым, посна тестикулярный рецидивым, рашемдышт да угыч химиотерапийым палемдышт, но ынде – кугу дозан блок дене… Чаманаш гына кодеш, шарлыше черым нине блокат чарен шогалтен ышт керт – мартыште кокымшо, уже лувем рецидивым диагностироватлышт. Мемнам Николай Николаевич Блохин лÿмеш онкологийым шымлыме национальный медицине рÿдерыш кусарышт. Тыште эшеат неле химийын блокшым эртарышт…
Ярослав эмлалтме дене кылдалтше чыла процедурым, корштымым, йöндымылыкым шып чыта… Но чер моткоч осал, тудым эсогыл химий сеҥен огеш керт… Мыланна Российыште тиде чер деч эмлалтме могай йöн уло гын, чыла эртенда маньыч… Но ме нигузеат чакнен огына керт!
Тыге, йот элласе клинике-влак дене кылым ыштышна. Нунын кокла гыч Израильысе Хаим Шиба лÿмеш медицине рÿдер Ярославым эмлаш налаш келшыш. Тусо медик-влак Российыште кучылт кертдыме вес йöн дене кумдан пайдаланат, да эргыланна черым сеҥаш полшен кертыт! Но эмлалташ 26748150 теҥгеаш, 411510 доллараш, счётым колтеныт! Тендан полышда, моло поро еҥ-шамычын полышышт деч посна ме тыгай суммым нигунамат поген огына ситаре! Жапат огеш вучо: бласт-влак Ярославын 90 процент лувемжым авалтеныт…
Теве тыгай паша. Йолташ-шамыч, поро кумылым ончыктен, кажныже мыняр теҥгем кертеш, тунар пуэна гын, Ярославын илышым арален кодаш полшена!
Оксам Ярославын аваже Людмила Николаевна Яковлеван Сбербанк картышкыже (номерже – 2202 2008 1779 8620) да Тинькофф картышкыже (номерже – 5536 9141 5688 4631) колтыман. А лекше йодышым 89177107707 номеран телефон дене рашемдаш лиеш.
Шарныза, Юмо мемнан деч «Мыняр пуэнат?» огыл, а «Молан полшен отыл?» манын йодеш…
М.ИВАНОВА
