але Олаште илыше-шамыч уэмдышаш ты кумдыкым могайым ужнешт?
«Ола кумдыкым тачысе илышлан келшышын тӱзатымаш» федерал программе кышкарыште оласе общественный верлам сӧрастарен уэмдыме паша умбакыже шуйна. Икмыняр проектым илышыш шыҥдарыме деч вара тений Йошкар-Олаште ноябрь мучаш марте С.Чавайн лӱмеш бульварым, Воскресенский проспект гыч тӱҥалын, Киров урем марте, уэмдаш тӱҥалыт.
Икмыняр тылзе ончыч соцкылысе ола администрацийын «ВКонтакте» лаштыкыштыже олаште илыше-шамычлан бульварым тӱзатен уэмдыме шотышто йодыштмашан да темлымашан йӱклымашым увертарен ыле. Тушто ончыкыжо могай вашталтышым ужаш шонымыштым шукын темленыт. Вет лачшымак йӱклышӧ-шамычын пеҥгыдын шогымыштлан кӧра Чавайн бульварым оласе общественный кумдыкым сӧрастарыме планыш ик эн ончыч шуктышаш радамыш пуртымо.
Йӱклышӧ кокла гыч эн шукынжо бульварыште велосипед дене лӱдыкшыдымын кудалме корным келыштараш йодыныт. Шагалын огыл светодиодный гирлянде дене сӧрастарыме леведышан, тура кечыйол пелтыме деч ӱмылыштӧ каналташ лийше пу левашым (перголым) икмыняр вере вераҥдаш да ойыртемалтше ужар кушкылым ешарен шындаш темленыт.
Кумдыкым уэмдыме ончыкылык проектым йӱклышӧ-влакын поснак эн кӱлешан да оҥай темлымашыштым шотыш налын ыштыме. Кодшо кечылаште, верыш лектын, тӱзатышаш кумдыкым ончен савырнымеке, ыштышаш пашалан вуйын шогышо «Город» МУП-ын директоржо В.Дождиков ден «Йошкар-Ола» ола округ администрацийын архитектур да градостроительстве виктемжын вуйлатышын сомылжым жаплан шуктышо А.Дождиков пужен ыштыме проект шотышто лекше йодышым рашемденыт. Уэмдыме кумдык ончыкыжо могай лийшаш шотышто Андрей Дождиков тыге каласыш:
– Проектым пеш кӱчык жапыште ышташ логалын. Вет ончычшо Сеҥымаш паркым тӱзатен уэмдаш палемдыме ыле. Тиде проект муниципал контракт почеш ышталтын. «Парус» проект управлений» верысе проект фирме ыштен. Тудым торгыш ты арняште лукташ шонена. Тылзе але иктаж нылле кече гыч бульварым пужен ышташ тӱҥалше сеҥыше компаний пале лийшаш.
– Ты кумдыкышто йолын коштмо ужашыштыже асфальт, а каналтен шинчыме теҥгыл тураште брусчаткым шарыме лиеш. Лопка велосипед корно, йоча площадке, йӧнан пеҥгыде теҥгыл, оҥай форман урно деч посна проект почеш тыште чылажге ӱмылыштӧ каналтен шинчаш пу оратан, шке чӱкталтын-йӧрталтше, кӱшылжым светодиодный гирлянде дене сӧрастарыме леведышан 8 пергол лийшаш. Интернетыште «шинчыше» да эре телефоныш ончышо-шамычлан икмыняр у вашталтышым пурытымо. Чавайн бульвар ден Петров урем ушнымаште «йол йымалнысе светофорым» келыштарат. Бордюрышто тӱрлӧ тӱс дене чӱкталтше «Шого!» але «Кай!» манмым ончыктышо полоско палдараш тӱҥалеш.
Теҥгыл пелен USB резетке-влакым шупшыт да яра WiFi-ым ушаш шонат. Тыгак бульвар кумдык мучко кок велымат лапка да кӱкшӧ светодиодный светильник-влак волгалтараш тӱҥалыт. Лапка светильник-шамыч йолын коштмо тураште шогаш тӱҥалыт гын, каныме теҥгыл воктене торшер сынан вераҥдыме лиеш. Олаште илыше калыкым куандараш ыштыме, шулдакан огыл ты погым чаманыде, шалатылын, локтылын ынышт керт манын, бульварыште шуко вере видеокамер эскераш тӱҥалеш.
Изи огыл каныме кумдыкышто иктаж вере шонданым ышташ палемдыме мо манын йодмеке, вашмут тыгай лие:
– Кызытеш тидым палемдыме огыл. Тыгай кӱлешлык лектеш гын, кеҥеж жаплан келыштарыме сынан, биконтейнерлам вераҥдылаш йӧн уло. Такшым гын телым тудын кӱлешлыкше уке.
– «Город» МУП-ын пашаеҥже-шамыч Йошкар-Оласе тӱшкан пайдаланыме кугу ужашыжым эреак яндарын да шотышто кучаш тыршат, – палемдыш ты предприятийын директоржо В.Дождиков. – Тыгак «Ола кумдыкым тачысе илышлан келшышын тӱзатымаш» федерал программылан кӧра олаште илышым эшеат саемдаш, общественный кумдыкым сӧрастарен уэмдыме палынак полша. Ӱшанем, шуко оҥай да ойыртемалтше вашталтышым илышыш шыҥдарымылан кӧра Чавайн бульварын уэмдыме ужашыже моторын койшо веле огыл, кызытсе илышын йодмыжлан келшен толшо лиеш.
Р.Чепакова.
Снимкыште: В.Дождиков ден А.Дождиков проект дене палдарат;
кандаш пергол кокла гыч иктыже тыгай лийшаш.
Администраций сайт гыч налме фото-влак.
