Экзамен
Ямде улмыштым ончыктеныт
Йошкар-Оласе технологий колледжым «электроснабжений» специальность дене тунем пытарыше-влак демонстраций экзаменым «Мариэнерго» филиалыште кученыт.
Демо-экзамен выпускник-влакын шинчымашыштым чынлан лишыл условийыште аклаш йӧным пуа, вет нунылан практике заданийламат производство верыште шукташышт перна.
Кыдалаш профессионал образований программе почеш профиль дене келшыше тыгай экзаменым эртараш Семёновко РЭС-ым ойырен налме, а эксперт сомылым филиалын специалистше-влак шуктеныт.
Тунемме заведенийлан иктешлыше кугыжаныш аттестаций годым пашам пуышо дене кылым тыге кучаш, «Мариэнерго» филиаллан выпускник-влакын посна специальность дене кузе ямдылалтмыштым аклаш, а студент-влаклан экзаменым сайын сдатлаш веле огыл, тыгак пашам пуышо ончылно шке моштымаштым ончыкташ пеш келшен толеш.
«Мариэнерго» филиалын директоржо Сергей Хлусов калсен: «Йошкар-Оласе технологий колледжын выпускникше-влак профессионально ямде улмыштым да келге шинчымашыштым ончыктеныт, сандене нунылан пашаш пурашышт полшаш ямде улына».
Юрий ИСАКОВ.
Снимкыште: ончыкылык энергетик-влак – экзаменыште.
Фотом «Мариэнергон» пресс-службыж деч налме.
