Марий Элыште 12275 еҥ пенсийже дене пырля «ялысе» ешартышым налеш.
Ялозанлыкыште кужу жап пашам ыштыше-влак 25 процентлан кугу пенсийым налаш праван улыт. Тидланже 30 ий деч шагал огыл «ялысе» стаж кӱлеш, а эше – ялыште илаш (олашке куснымек, палемдыме ешартыш оксам тӱлымым огыт чарне), сулен налме канышыш лекмеке, пашам ышташ огыл.
2023 ий 1 январь гыч ялысе стажлан шоҥгылык шотышто страховой пенсийыш 1891 теҥгем ешарен тӱлат, III группо инвалидность шотышто пенсийыш – 945 теҥгем.
Ешартыш оксам колхозышто, совхозышто да моло ялозанлык предприятий ден организацийыште вольыкым, кушкылым да колым ончымо пашам шуктышо ялысе пенсионер-шамычлан тӱлат. Ешартыш оксам тӱлаш правам пуышо спискыш 500 утла профессийым пуртымо, нунын дене фондын сайтыштыже палыме лияш йӧн уло.
Ялозанлыкысе паша стажыш ялозанлыкыште пашам ыштыме годым икмыняр жап пашам ыштен кертдыме пагыт, ий еда ойыралтше тӱлыман тӱҥ да ешартыш отпуск, ача-ава кокла гыч иктыжын кажне йочам 1,5 ияш лиймешкыже ончымо (но чумыр налмаште 6 ий деч шуко огыл), РФ Вооруженный вийыште военный службым мобилизаций шот дене эртыме, контракт дене служитлыме (2022 ий 24 февраль гыч), добровольческий формированийыште лийме жап пурталтыт.
Ялозанлыкысе паша стаж календарный радам дене шотлалтеш, тыгодымак специальный военный операцийыште участвоватлыме пагыт – кок пачаш кугун.
М.ИВАНОВА
