СОЦИАЛ ИЛЫШ

Окса дене тауштат

Марий Элыште 4902 ветеран Кугу Отечественный сарыште сеҥымылан 75 ий темме вашеш ик гана тӱлыман выплатым налеш.

Тудым Россий Пенсий фонд апрельыште пенсий да моло социальный выплате дене пырля пуа. Оксам налашлан фондыш лӱмын кошташ огеш кӱл, тудо Россий Пенсий фондышто улшо дела негызеш йодмаш деч посна ойыралтеш. Кок пенсийым: иктыжым – Пенсий фонд гоч, весыжым – силовой ведомствыла гоч, налше-влаклан выплатым Пенсий фонд ышта.

Тыгайрак сынан пытартыш выплатым 2015 ийыште 9 май вашеш ыштыме. Тунам элна Сеҥымашлан 70 ий темым палемден. Вич ий ончыч Кугу Отечественный сарын участникше ден инвалидше-влаклан 7 тӱжем, тылын труженикше-шамычлан 3 тӱжем теҥге дене пуымо.

Тений Сеҥымашлан 75 ий темме вашеш нине еҥлан 75 тӱжем теҥге дене пуат:

  1. Кугу Отечественный сарын ветеранже, ты шотыштак участникше, военный объектлаште пашам ыштыше граждан, СССР-ын жаплан оккупироватлыме кумдыклаштыже кредалше партизан, «За оборону Ленинграда» медаль, «Жителю блокадного Ленинграда» знак дене палемдалтше-влаклан;
  2. Кугу Отечественный сарын ветеранже-шамычлан;
  3. Кугу Отечественный сар жапыште фашист ден тудын союзникше-шамычын ыштыме концлагерьлаштын, геттолаштын да виеш кучымо моло верлаштын тунамсе ийготыш шудымо узникыштмытлан;
  4. Кугу Отечественный, совет-финн, совет-япон сарлаште вуйым пыштыше военнослужащий-влакын тулык ватышт ден марийыштлан;
  5. Кугу Отечественный сарын колышо инвалидше ден участникше-влакын тулык ватышт ден марийыштлан.

Палемдыме радамыш таче кечылан регионыштына илыше 1296 еҥ пура.

Эше 3606 еҥ Сеҥымаш кече вашеш 50 тӱжем теҥге дене налеш. Тиде – 1941 ий 22 июнь — 1945 ий 9 май пагытыште тылыште куд тылзе деч шагал огыл жап пашам ыштыше, Кугу Отечественный сар годым вийым чаманыде тыршымылан СССР-ын орденже да медальже дене палемдалтше-шамыч.

Марий Элыште Сеҥымашлан 75 ий темме вашеш палемдыме еҥ-влаклан 75 да 50 тӱжем теҥге дене пуаш 277 млн. теҥгем ойырат.

Тидымат палемден кодыман, Кугу Отечественный сарын инвалидше ден участникше-шамыч тиде суммым Россий президентын 2019 ий 24 апрельыште лукмо пунчалже почеш палемдыме ий еда тӱлыман 10 тӱжем теҥге дене пырля налыт. Ӱмаште майыште тыгай выплатым 227 еҥлан тӱлымӧ.

М.ИВАНОВА

Опубликовать в Одноклассники

Добавить комментарий