У Торъял районысо Шӱвылак ялыште курыкан верыште верланыше кок пачашан мотор сурт мылам поснак келшыш.
Озаже – Александр Шишкин. Мийымына годым Александр Викторович эргыж дене шудым оварташ оравам мучыштарен да шорвондым пижыкта ыле. Пакча шеҥгелне — кугу леваш. Левашыште кукшо шудым шапашлыме – телылан ямдылалтыт.Туштак пареҥгым шындаш, ӱяҥдышым кышкаш агрегат-шамыч да молат койыт. Пакчам четлыкан рабице сетке дене печен налме: тыге пакчаш лум ок шич. Тиде уремыште суртым эн ончыч Александр Викторович шынден, тудак икымше кермыч мончам ыштен.
– Мый Шемермучаш ялеш шочын-кушкынам, – ойла пӧръеҥ. — Ялна кызытат уло, тушто шӱжарем ила. Пелашем Евгения Семёновна Шуйдӱр гыч, тушто куд ий иленна, туштак Рудик эргына шочын. Тышке 1982 ийыште илаш кусненна, пӧртым ышташ кутырен келшенна. Эн ончыч чоҥымо материалжат лийын огыл. Шоналтет да… Тиде уремжат уке ыле, а вара моло-шамыч чоҥаш тӱнальыч. Варажым, 2014 ийыште, тудын олмышто у суртым ыштенна. Ме пелаш дене ончылгоч ямдылалтынна: материалым, чодырам налынна.
— Мый «1 Май» колхозышто шофёрлан ыштенам, — мутланымына годым эргыже каласыш да, чеверласен, Шукшаныш трактор дене кудале.
— Ме вет кажне ийын кок ушкалым, ӱшкыжым, сӧснам онченна, — умбакыже мутшым шуя Александр Викторович. — А пелашем Марий АССР-ын сулло ветеринарже ыле. Чаманен каласыман, тудо илышыж дене 63 ияшыж годым чеверласен. Техникына уло, сандене пошкудо-влак полшаш йодыт. Мый ятыр ий трактор, автомашина дене ыштенам да Володя эргымым тидлан туныктен шуктенам. Кызыт тудо техник-механиклан тырша. Мый колхозышто тыгак топливан аппаратурым олмыктымо шотышто слесарьлан пашам ыштенам, кызыт сулен налме канышыште улам.
Туге гынат суртоза яра ок шинче.
— Пӧрт кӧргым кугурак эргым Рудик сылнештарен, — куанен ойла суртоза. Тудо — военный, шке жапыште Н.Крупская лӱмеш Марпединститутын индустриально-педагогический факультетшым тунем пытарен. Тыште тошкалтышым поген, кухньым ышташ чыла вискален да планироватлен. Ялыште оласе семынак чыла шотыштат йӧнан лийже манын тыршенна.
Вара суртоза чапле гармоньжым ончыктыш да, йодмо почеш, торъял семым шокталтыш. А мучашлан тудо мыланем пелашыж дене пырля войзалтме фотокартычкыштым ончыктыш.
М.СКОБЕЛЕВ
Авторын фотожо
