Марий Элыште «Профессионалитет» федеральный программе илышыш умбакыже пурталтеш. Республикыштына илыше самырык тукымым пашазе специальность-влаклан кумылаҥдыме профориентаций паша Юл кундем кугыжаныш технологий университетын Йошкар-Оласе аграрный колледжыштыже ялозанлык направлений дене почылтшо «Агротехник» тунемме-производство кластерыште поснак виян ышталтеш: преподаватель ден студент-влак школлаште тунемше-шамыч дене вашлиймашым да производство экскурсийым эртарат, мастер-классым ончыктат.
Шукерте огыл колледжын директоржо Геннадий Богданов ден Йошкар-Оласе 10-шо №-ан школым вуйлатыше Алексей Никитин Килемар кыдалаш школышто лийыныт. Тушто тунемме верын директоржо Наталья Лошманова дене школ пелен 8-9-ше класс-влаклан агроклассым (профориентаций группым) почмо шотышто мутланеныт.
«Профессионалитет» программе кышкарыштак март мучаште Волжский районысо Пӧтъял кыдалаш школын 8-11-ше классыштыже тунемше-влак республикыштына ик эн виянлан шотлалтше «Овощная лагуна» кресаньык-фермер озанлыкыш экскурсий дене миеныт. Тудыжо «Агротехник» тунемме-производство кластерын партнёржылан шотлалтеш. Экскурсийым озанлыкын директоржо Андрей Пушкин эртарен. Тудо йоча-влаклан кушкылым ончен куштымо нерген каласкален да пакчасаскам аралыме верым ончыктен.
А Кужэҥер районысо Йӱледӱр кыдалаш школын 7-ше классышкыже коштшо-шамыч верысе «Искра» колхозышто лийыныт. Нуным тушто кормам ямдылыме паша дене палдареныт, кызытсе ялозанлык техникым ончыктеныт.
Г.Кожевникова
Фотом Йошкар-Оласе аграрный колледжын сайтше гыч налме
