«Яллаште тылзе еда тазалык кечым эртараш темлем, тиде йодышым Минздрав дене пырля ончена», – манын черетан оперативный совещанийыште Марий Элым вуйлатышын пашажым жаплан шуктышо Юрий Зайцев.
Регионым виктарыме рӱдерын вуйлатышыже Виктор Трифоновын увертарымыж почеш, социальный кыллаште калык медицине полышым, поснак аҥысыр специализациян врач-влакын консультацийыштым яллаште налме шотышто нелылык улмо нерген воза. Ялысе-шамычлан кардиологын, эндокринологын, дерматологын да моло специалистын приёмышкышт райрӱдыласе але лишыл олаласе, эсогыл рӱдоласе больницылашке кудалышташ логалеш.
Ю.Зайцев республикыште илыше чыла еҥлан медицине полышым налаш йӧным ышташ кӱлмым палемден.
«Верлаште, кушто ФАП-влак улыт, но больнице марте кудалаш тора, медицине специалистын приёмышкыжо да шымлымашке логалаш неле. Тиде йодышым посна лончылаш тӱҥалына. Мый тылзе еда тазалык кечым эртараш темлем. Тидым кузе чын ыштыме нерген Тазалык аралтыш министерстве дене посна каҥашена. Калык чын вуйым шиеш», – манын регионым вуйлатышын пашажым жаплан шуктышо.
ЦУР-ым вуйлатышын докладше дене келшышын, эртыше арнян «Инцидент Менеджмент» системыш 573 увер пурен. Эн шуко йодыш уремлам олмыктен пытарыме жап, частный секторлаште корнын поснак начар улмыжо, кумдыкым тӱзатыме, социальный обслуживаний да тӱшка транспортын пашаж дене кылдалтын.
«Калыкын вуйшиймашыжым лудам. 6 августышто ала-кӧ троллейбусым ик шагат наре вучымыж нерген возен ыле. Калыклан пайремым темлена гын, тудым кондаш да наҥгаяшат йӧным ыштышаш улына. Тӱшка мероприятийым эртарыме годым шуко уто-ситым шотыш налаш кӱлеш», – палемден Ю.Зайцев.
В.Трифоновын палдарымыж гыч, эртыше арнян инфопасуш пурышо увер-влакын чотышт тӱҥ шотышто сай амал кӱшеш 22 процентлан кугемын.
Марий Эл Республикым вуйлатышын организаций да аналитике виктемжын уверже негызеш М.ИВАНОВА ямдылен
