Волжский районысо Памар кундемыште Кугу Отечественный сарын ветеранже да тылын труженикше-шамычым шушаш Сеҥымаш кече дене саламленыт.
Россий президент Владимир Путинын посна еҥ-влакым «80 лет Победы в Великой Отечественной войне 1941-1945 гг.» юбилейный медаль дене наградитлыме нерген указым лукмыж жаплан Памар кундемыште вич ветеран шотлалтын. Чаманен палемдаш кодеш, тений январьыште Кӱсола ялыште илыше Анна Ивановна Степанован ӱмыржӧ кӱрылтын. Ветеранлан палемдалтше медальым уныкажлан пуымо.
Жапше годым тиде ялыштак илыше вес ветеран Анна Егоровна Лукояновам ӱдыржӧ Волжск олашке илаш наҥгаен. Тудын йодмыж почеш, медальым пошкудыштлан кодымо.
А теве Памар селаште илыше Ксения Петровна Павлова ден Нина Павловна Аксеновам, Пӧртанур ялыште илыше Екатерина Алексеевна Королевам Памар ял шотан илемым вуйлатыше, верысе депутат-влак погынымашын председательже Ирина Васильева, Памар ял шотан илем администрацийым вуйлатышын пашажым жаплан шуктышо Христина Гаврилова да Волжский муниципальный район администрацийым вуйлатышын социальный йодыш дене алмаштышыже Сергей Сычев мӧҥгыштышт шинчаваш ончен саламленыт, тылыште шкем чаманыде тыршымылан, Сеҥымашым лишемдымашке надырым пыштымылан уло шӱм-чон дене тауштеныт да «80 лет Победы в Великой Отечественной войне 1941-1945 гг.» юбилейный медальым кучыктеныт.
Тиде мероприятий Шочмо элнан историйжым, Кугу Отечественный сарыште шке илышым чаманыде кредалше, тылыште ударле паша дене Сеҥымашым лишемдаш полшышо ветеран-влакым тукым гыч тукымыш шарнаш кӱлмым эше ик гана пеҥгыдемден.
Маргарита ИВАНОВА
Памар ял шотан илем администрацийын фотожо
