Шукерте огыл Российысе профсоюз организацийын Марий Элысе тӱвыра пашаеҥ-влакын организацийышт отчёт да сайлымаш погынымашым эртарен.
Профсоюз лидер-влакым саламлаш Марий Эл правительстве председательын алмаштышыже-тӱвыра, савыктыш да калык-влакын пашашт шотышто министр Константин Иванов миен. Тудо республикысе тӱвыра аланыште пытартыш жапыште лийше сай ошкыл-влак, специальный военный операцийыште улшо-влаклан, тыгак республикын подшефныйлан шотлалтше Запорожский областьысе Куйбышевский муниципал округлан полышым пуымо дене палдарен.
– Профсоюзын илышыштыже чолгалыкым ончыктышо, тӱвыра аланыште тыршыше коллеге-влакын интересыштым аралыше кажне еҥлан тауштем. Ме пырля республикын вияҥмыж верч тыршыше еҥ-влакын кажне кечын пашам ыштыме условийыштым саемден да праваштым арален толмо шотышто кугу пашам шуктена, – каласен Константин Иванов.
Погынымаште тӱвыра пашаеҥ-влакын профсоюз рескомжым вуйлатыше Владимир Ушнурцев пытартыш вич ий жапыште ыштыме пашам иктешлен. Ончыктен кодыман, таче ты радамыште 2,4 тӱжем еҥ шога. Организаций эртыше жапыште 31 заседанийым эртарен. Тушто 296 йодышым ончен, шотыш конден.
Тыгак конференцийыште ревизионный комиссийын отчётшым колыштыныт, ончыкылан паша планым пеҥгыдемденыт. Профсоюз организацийын пашажым виктарыше у составым сайленыт. У вуйлатышылан угыч Владимир Ушнурцевым сайленыт.
Светлана Носова
Фотом республикысе тӱвыра пашаеҥ-влакын профсоюз организацийыштын воткыл лаштыкше гыч налме.
