УВЕР ЙОГЫН

Врач-влак огыт сите

hh.ru шымлыше службо, паша ден пашаеҥ-влакым кычалме шотышто российысе кугу онлайн-платформо, «Медицине, фармацевтике» профессиональный аланысе паша рынкыште ситуацийым иктешлен: тудо ончычсо семынак ик эн дефицитный – 2021 ийлан ямдылыме увер почеш, тыште ик вакансийлан кокла шот дене улыжат 1,4 резюме логалеш.

Пашам пуышыланат, кычалшыланат паша рынкыште ик вакансийлан кокла шот дене 5-6 резюме улмо годым йöнан. Медициныште паша верлан тыгай конкуренций таче элнан ик регионыштыжат уке. Москваште пашам пуышо-шамычлан гына изиш каньыле: тыште ик медицине вакансийым кокла шот дене 3,3 еҥ тавала, Санкт-Петербургышто – 2,6, Ставрополь крайыште – 2,4, Башкортостан Республикыште – 2,1, Астрахань областьыште – 2.

Российын моло регионыштыжо «Медицине, фармацевтике» профессиональный аланысе ик вакансийлан кок резюмеат огеш погыно, а 37 регионышто конкуренций ик верлан ик претендент дечат изи. Мутлан, Марий Элыште ик медицине вакансийлан кокла шот дене 0,8 резюме логалеш (2020 ийыште 1,1 резюме погынен).

Пашаеҥ-шамычым пашашке сымыстарен кондымо ик эн виян йöнлан ончычсо семынак финанс вознаграждений шотлалтеш. 2021 ийыште медик-влаклан эн кугу пашадарым Магадан областьыште (74277 теҥге) да Москваште (71090 теҥге) темленыт. Марий Элыште медицине вакансийлаште кокла пашадар 35 тÿжем теҥге гына лийын.

hh.ru cлужбын шукерте огыл эртарыме йодыштмашыже рашемден, медик-влак шкеныштым паша рынкыште пеш каньылын кучат: чумыр чотышт гыч 18 процент ужаш еҥ гына паша гыч луктын колтен кертмым ужыт, 73 процент ужаш специалист тидын деч йöршынат огеш лÿд, а у паша верым кычалше 62 процент ужаш медик тудым лишыл жапыште мумыж шотышто огеш кокытелане, тидым 33 процент ужаш еҥ гына шижеш. Тыгодымак 63 процент специалистлан профессиональный аланыште келшыше пашам муаш неле, а 29 процент медик тидын шотышто мöҥгешла шона. Гарантироватлыме паша верлан кöра 36 процент ужаш медик шонымо деч изирак пашадарым налаш ямде, 49 процент ужаш медик тыгай ошкылым ышташ огеш келше.

«Ниармедик» клинике-влак сетьын персонал-шамыч шотышто директоржо Ирина Сережкина частный медицине клинике-влаклан дефицитан паша рынкыште кандидатым ойырен налме годым йоҥылыш лийме деч теве мом темла: «Медициныште кÿкшö квалификациян кадрын ситыдымыже шукертак палдырна. Но у коронавирус инфекцийын пандемийже шуко татым нелемден, да таче тиде йодыш эшеат пÿсемын. Частный клинике-шамычлан пашаеҥ шотышто шке коклаштышт веле огыл, кугыжаныш медицине тöнежла денат конкурироватлашышт логалеш. Медперсонал шагал, а доктор-влакын утларак ужашыже кугыжаныш медицине организацийлаште ышта, тыгак кунам врач-шамычлан кугу пашадарым темлат, поснак – Москваште. Мыланна тыгай ситуаций йöршынат пайдале огыл.

У чарак-влакым пуртымо да ковид-госпиталь-шамычым почмо шотан форс-мажорлан ямде лияш манын, ме кадр йодышым рашемдыме у йöн-влакым кычалаш тÿҥална, пашанам пужен чоҥышна. Мыланна штатым кугемдыме да доктор-влакын клинике-шамыч коклаште куснылмыштым вияҥдыме паша сайын полша, вуйлатыше-шамычын медик-влакым совместительстве йöн дене пашам ышташ налмыштат – ÿшанле ошкыл. Медик-влак клиникыштына пашам ыштынешт гын, ме куанена веле: кажныжлан тÿлымö посна йöным да пашам ыштыме жапым темлаш ямде улына. Штатыште улшо специалист-шамычланат нимогай чаракым огына ыште –  нунылан вес вереат пашам ышташ йöным пуэна. Тыге, куштылгыжак огыл идалык мучко пашаеҥ-шамычым ситышынак погена. Кадрым ойырен налме пашам шотыш кондаш, заказчик-шамыч дене кылым ышташ, пашанам писемдаш, саемдаш да вияҥдаш кызытсе жаплан келшыше технологический пунчал кÿлын. Персоналым ойырен налме Talantix системым илышыш пуртымына компанийыштына кÿлешан йыжыҥ лийын: вуйлатыше-шамыч дене чыла йодыш шотышто кутырен келшенна, кадрым ойырен налме пашам палынак писемденна, тудым чылалан койшым ыштенна».

Марина Хадина, Talantix CRM-системым вияҥдыме шотышто директор, hh.ru: «Пандемий медицине аланын HR-командыже-влакым чот терга. Тыгай годым рекрутер-шамычлан тÿжвал факторлан жапым шуйкалыде вашешташ, тыгак корпоратив аланыште лывырге лияш кÿлеш, поснак – наймын тактикыже да условийже, линейный манме да компанийлам вуйлатыше-шамыч дене пашам шуктымо шотышто. Вакансийым сайын петыраш манын, поснак – дефицитан специализаций сегментыште, чыла участник виктарен да ужын кертме ойырен налме процессым ышташ кÿлеш. Медицине персоналым теният кычалаш тÿҥалына. Сандене бизнес дене коммуникацийым кызытак трансформироватлаш (тидым тымарте ыштен огыдал гын), рынкын кÿлешан йодмашыже-шамычлан HR-стратегийым келыштараш, релевантный манме кадр шапашлан кугу тÿткышым ойыраш темлем. Да, конешне, технологичный пунчал-влакым – рекрутмен-шамычлан Talantix СRM-системым – илышыш пурташ кÿлеш. Чыла тиде медик-влакын ситыдымышт жапыште писе да конкурент виян пашам пуышо лияш манын, кандидат-шамычын базыштым кучаш, ойырен налме годым кид дене шуктымо пашам иземдаш, найм процессым иктешлашлан увер дене пайдаланаш полша».

HeadHunter (hh.ru) (NASDAQ: HHR; MOEX: HHRU) – Российыште онлайн-рекрутингын кугу платформыжо. Тудын клиентшылан 450 тÿжем утла компаний шотлалтеш. HeadHunter платформын тÿҥ шонымашыже компаний-влаклан пашаеҥ-шамычым, калыклан келшыше пашам муаш полшымашке да чыла тидым писын, кок могыржыланат пайдам ыштен шуктымашке викаралтын. Компанийын базыштыже 55 миллион утла резюме уло. 2020 ий мучаште кече еда кокла шот дене 691 тÿжем вакансий лийын.    SimilarWeb увертарымыж почеш, hh.ru паша ден пашаеҥ-влакым тÿня мучко кычалме шотышто кумдан палыме порталлан шотлалтеш. Компанийын акцийже-влак NASDAQ Composite (IXIC) да NASDAQ Industrial (IXID) индекс-шамычын расчётышкышт пурат.

                                                                                          М.ИВАНОВА

Опубликовать в Одноклассники

Добавить комментарий