Марий Элыште инвалид ден пенсионер-шамыч социальный такси дене пайдаланен кертыт.
Социальный такси – у услуго, тудо начарын коштшо да коштын кертдыме граждан-влакым социальный инфраструктур объектлашке шупшыкташ палемдалтын:
— тазалыкым аралыме тӧнежлашке;
— социальный вияҥмаш министерствын тӧнежлашкыже;
— медико-социальный экспертизын тӧнежлашкыже;
— протезно-ортопедический предприятийлашке;
— нотариальный конторылашке;
— судлашке;
— юстиций министерствын тӧнежлашкыже;
— санаторийыште да курортышто эмлалташ путёвко улмо годым вокзаллашке;
— банклашке;
— библиотекылашке, музейлашке, ончерлашке;
— физкультур да тазаҥдыме диспансерлашке;
— шинчымашым пуышо тӧнежлашке;
— инвалид-влакын мер организацийлашкышт;
— «Российын почтыжо» федеральный почто кылын пӧлкалашкыже.
Тиде услугым Йошкар-Ола да Медведево район кумдыклаште пуат, моло случайыште, мутлан, эмлыме тӧнежыш направлений, социальный обслуживанийын стационар тӧнежышкыже путёвко улмо годым, граждан-влакым Марий Эл мучко шупшыктен кертыт. Ешартыш услугылан тӱлыман, тыгодым тудын тарифше калыкым шупшыктышо транспорт фирме-влакын деч изирак: ола мучко — 1 километрлан 13,07 теҥге, олалашке кондыштарымылан – 1 километрлан 10,44 теҥге.
Инвалид ден пенсионер-влакым сертифицироватлыме, ГОСТ-ын йодмашыжлан келшен толшо Lada Largus автомобиль дене шупшыктат. Тудо тыглай такси деч кондыштарыме йӧнжӧ дене ойыртемалтеш: машинаште пандус, крепёж да моло оборудований улыт. Социальный такси план почеш пашам ышта, сандене заказчик тудын услугыж дене пайдаланаш шонымыж нерген социальный службыш кок кече ончычак увертарышаш. Тылеч посна, корныш тарваныме деч ончыч водительлан пеҥгыдемдыше документшым ончыктышаш, а вара шуктымо паша нерген актыш кидпалыжым пыштышаш.
Услуго дене чыла еҥ пайдаланен кертше манын, кажне йодмашым посна ончат. Тыгодым тазалыкым аралыме тӧнежлашке тарваныше инвалид ден начарын коштшо, коштын кертдыме граждан-влаклан автомобильым эн ончычак ойыраш тыршат. «Социальный такси» услугым социальный паша шотышто специалист (диспетчер) ден водитель пуат.
Социальный такси дене пайдаланаш шонымо нерген йодмашым Калыкым социально обслуживатлыме рӱдерлашке пуыман: Йошкар-Олаште — Машиностроитель-влак урем, 6-шо Б пӧрт, 213-шо кабинет (паша кечын 8 гыч 16 шагат марте, 12 гыч 13 шагат йотке – кечывал каныш) адрес, 8 (8362) 41-82-72 номеран телефон дене але gurmekcson@mail.ru электрон почто гоч, Волжск олаште – Щорс урем, 13-шо пӧрт адрес, 8 (8362) 4-97-41 номеран телефон да ktssonvolzhsk@mail.ru электрон почто полшымо дене.
«Социальный такси» услуго дене I, II, III группо инвалид, инвалид йоча ден тудым кондыштарыше еҥ, Кугу Отечественный сарын инвалидше ден участникше, начарын коштшо але коштын кертдыме 60 ий деч кугурак пенсионер-влак, соцработник-шамычын мӧҥгыштӧ обслуживатлыме пенсионерышт ден инвалидышт пайдаланен кертыт.
М.ИВАНОВА
