Марий профессиональный музыклан негызым пыштыше композитор И.С.Палантайын возен кодымо мурыжо-влакым посна книга дене савыктен луктыныт.
Тудо «Марийские народные песни: собрание И.С.Палантая» маналтеш да композиторын шочмыжлан 140 ий теммылан пӧлеклалтын.
Тидын нерген МарНИИЯЛИ шке воткыл лаштыкыштыже увертара. Сборникым институтын шанче пашаеҥже Наталья Мушкина чумырен. Тушко олык, эрвел да курыкмарий-влакын 56 тошто мурыштым пуртен. Нуным Иван Степанович 1918–1925 ийлаште возен коден.
Нине сем-влак марий калык муро сымыктышын поянлыкшылан шотлалтыт. Кажныштыже калыкнан поян сылнысем ден сылнымут мастарлыкше почылтыт. Сайже деч сайжым композитор ойырен налын, кундемнан профессиональный музыкшылан негызым пыштен.
МарНИИЯЛИ-н воткыл лаштыкше гыч налме фото.




