Йошкар-Оласе Ленин проспект уремыште верланыше ончыкылык Марий парк кумдыкышто вондерлам шындат, увертара мэрий.
Шукерте огыл тыште чашкерла лӱшкен шоген гын, теве парк «шочынат» шинчын. «Ола» предприятийын пашазыже-влак паркыш пурымаште гортензийым шындат, сайын иланыже манын, вӱдым шават. Вӱд шавымылан кӧра ӱдымӧ газон шудат ужарген, сӧраллыкым пурта. Вондерлам октябрьыштат, вес ий шошымат шындаш тӱҥалыт.
Сцене олмышто кызыт фундаментлык верым ямдылат, шушаш жапыште тудым бетон дене петырат. Районла нерген увер стенд-влакымат лишыл жапыште вераҥден шуктат.
Парк мучко шогалтыме электротул меҥге-влак торашке волгалтарыше да энергокуатым аныклыше улыт, тидым эртен кайыше-влакат шекланен шуктеныт.
Л.СЕМЕНОВА
Фотом Йошкар-Ола администрацийын сайтше гыч налме
