Татарстаныште «Свияжские Холмы» курорт-олаште «10000-11000 метр дистанций» дисциплиныште чарак-шамычан таҥасымаш дене Российын кубокшо лийын. Тушто Марий Элын чапшым Волжск гыч Нубар Гиносян арален да нылымше лийын.
Таҥасымаште вийыштым элнан ик эн виян спортсменже-влак тергеныт. Нубар Гиносян дистанцийыштыже чылаже 32 чаракым эртен да тыге республикнан историйыштыже таче тудо ты видыште – спорт разрядым налше икымше атлет.
24-25 августышто Волжскышто чарак-шамычан таҥасымаш дене Марий Элын икымше чемпионатше эрта. Ты вид дене ончыкыжым республикнан сборный командышкыже кӧм пуртат – лач тудо ончыкта.
Г.Кожевникова
Фотом Марий Эл Спорт да туризм министерствын сайтше гыч налме
