Марий Элым вуйлатыше Юрий Зайцев Юл кундем федеральный округышто Россий президентын полпредшын эртарыме совещанийышкыже ушнен.
Игорь Комаровын вуйлатыме почеш видеоконференций йӧн дене эртыше паша вашлиймашын тӱҥ йодышыжо-влак регионлаште мер-политике вияҥмаш, социально кӱлешан инфраструктурын пашам ыштымыже, специальный военный операцийышын ветеранже-шамычлан полышым пуымо, национальность-влак кокласе келшымашым пеҥгыдемдыме, тыгак округысо у мер проект-шамычлан стартым пуымо дене кылдалтыныт.
Полномочный представитель сайлымашым иктешлен да ончыкылык паша дене тӱҥ направленийлам палемден. Юл кундем федерал округышто Российын Кугыжаныш Думышкыжо депутат-влакым сайлыме дене пырля 650 утла сайлыме кампаний лийын, 4,8 тӱжем мандатым да сайлыме должностьым алмаштыме. Игорь Комаровын палемдымыж почеш, йӱклымашым кугу кӱкшытыштӧ эртарыме. 2021 ийысе сайлымаш дене таҥастарымаште, лийын кертше пудыртымаш шотышто йодмаш 5,6-лан шагалрак пурен.
Совещанийыште поснак кугу тӱткыш сайлымашке специальный военный операцийын ветеранже-влакын ушнымышт дене кылдалтше йодышлан ойырымо. Нунын кокла гыч вич еҥ Россий Кугыжаныш Думыш сайлалтын, 100 утлаже регион да муниципальный кӱкшытыштӧ депутат лийын. Игорь Комаров ветеран-влак дене умбакыже пашам ыштымын кӱлешлыкшым палемден.
Марий Элым вуйлатышын мутшо почеш, специальный военный операцийын ветеранже-влаклан полышым пуымаш, нуным регионын мер-политике илышышкыже ушымаш республикысе правительствын пашаштыже ик эн тӱҥ направленийлан шотлалтыт.
Сайлымаш нерген умбакыже ойлымыж годым полпред палемден: шушаш ийыште Марий Элыште, Удмуртийыште, Киров ден Саратов областьлаште кӱшыл должностной лица-влакым, тыгак Удмуртийын, Пензе ден Саратов область-влакын да Киров оласе думын законодательный органлашкыже депутат-влакым сайлымаш эртышаш. Регион-шамычын задачышт – калыкын илышыжым лӱдыкшыдымым, мер-политике могырым сайым ышташ да элым вияҥдыме шотышто Россий Федераций президентын палемдыме национальный цельыш шуаш.
Игорь Комаров тыгак тенийысе олтымо сезонышто социальный инфраструктурын чарныде пашам ыштымыже да коммунал сетьлаште лийын кертше аварийым жапыштыже кораҥдыме нерген ойлен.
Полпред регионлаште национальность-влак кокласе келшымашым пеҥгыдемдымым ик эн кӱлешан задаче семын палемден. Уэмдыме Кугыжаныш национальный политике стратегий да Российысе калык-влакын икоян улмо идалыкше дене келшышын, тудо Российысе калык-влакын ассамблейыштын регионысо пӧлкаже-влакым тиде сферын тӱҥ мероприятийлашкыже чолганрак ушаш, нунын проектыштлан увер полышым пуаш да пӧлкан пашажым уэмдыме шотышто йодышым ончаш кӱштен.
Российысе калык-влакын ассамблейыштын Марий Элысе пӧлкаже республикыште илыше коло утла калык-влакын еҥыштым уша. Юрий Зайцев палемден: тӱрлӧ этнокультур сообществе-влакын келшен илыме шотышто республикна – пример.
Игорь Комаров Юл кундем федеральный округышто мер проектлам илышыш пуртымо пашам вияҥдыме шотышто задаче-влакым палемден. Округышто СВО-н ветеран да участникше-влакын ешыштлан конкурс-фестиваль, вуз-шамычын спартакиадышт тӱҥалыт.
Марий Элым вуйлатышын пресс-службыжын уверже негызеш Галина Кожевникова ямдылен.
Фотом Марий Элым вуйлатышын пресс-службыж гыч налме.
