9 апрельыште Мурманск область Апатиты олаште ече дене Российын чемпионатыштыже Марий Эл гыч Ирина Соловьёвам спорт мастер нормативым шуктымыж дене саламлена.
Ирина УОР (МРМТ) 50 километр кужыт марафонышто 27-ше верым налын. Тыге тудо Российын спорт мастерже нормативым шуктен.
– Куржаш, мутат уке, пеш неле ыле. Южгунамже кидат пуаҥме гай чучын. Мыланем эрыкан йӧн дене куржталаш келша, а ты дистанцийым лач классике йӧн дене гына куржмо, – мане ечызе.
– Ирина пеш тыршыше ӱдыр. Молодец. Ече дене сайын куржталаш тудлан ачаже, тренер Сергей Соловьёв сай негызым пыштен. Ончыч биатлон дене кылым кучен, – ойла тренерже Евгений Рыбаков.
Чылаштымат сай кӱкшыт дене саламлена, вет спортсменын результатше тренер дене моткоч чот кылдалтын. Мурманск областьыштак шукерте огыл Дмитрий Чекулаев латвич километр кужытышто визымше лийын.
14 апрельыште ечызе-влак всероссийский таҥасымаште вийыштым тергаш тӱҥалыт. Нунылан сай результатым тыланена.
