Спорт дене кылым кучымо кап-кылым лывырта уш-акылым яндарешта, тазалыкым пеҥгыдемда…
Тачысе лаштыкыштына «Марий Эл» газет редакцийын пашаеҥже-влак тыгай йодыш-влаклан вашештат: йоча але самырыкда годым спортын могай видше лишылрак лийын? Кызыт илышыштыда спорт могай верым айла?
Эльвира КАЗАКОВА, редактор-кусарыше:
– Школышто куржталаш, ече дене кошташ чот келшен. Чӱчкыдынак тӱрлӧ таҥасымашке ушнымо, школын чапшым кӱшкӧ нӧлтымӧ. НВП урокышкат кумылын коштынам: мишеньыш лӱйкалыме, икымше полышым пуаш тунемме да моштымашнам шарналтен таҥасымаште тергыме.
Редакцийыш пашаш толмеке, кажне вӱргечын волейболла модынна. Телым Йошкар-Ола воктенысе чодырашкат ече дене лектынна, тӱвыра пашаеҥ-влакын профсоюзыштын республикысе организацийжын эртарыме таҥасымаштыжат ятыр гана сеҥымашке шуынна.
Каныш кечылаште пӧртем воктенысе школ стадионыш тӱрлӧ упражненийым ышташ, куржталаш лектынам, а уремыште ночко годым мӧҥгыштӧ капкылым тарватылынам. Телым ялыш мийымеке, тукым шольо-шӱжар-влак дене воктенысе кожерыш яндар южым шӱлалташ миен толына, пырля ече дене кошташат, курыкышто мунчалташат пеш келша. Тыге вий-куат ешаралтеш да тазалыкат пеҥгыдемеш. Теве вашке лум лиешат, уэш пӱртӱсыш лекташ шонена.
Татьяна ПОПОВА, шеф-редактор:
– Шернур Кукнур школышто тунеммем годым 6-шо гыч 11-ше класс марте куштылго атлетике дене заниматленам. Тӱрлӧ дистанцийым куржталмаште сеҥыше радамыште чӱчкыдын лийынам, районысо таҥасымашлаште школын чапшым ик гана веле огыл араленам. Сеҥымаш-влакым пеҥгыдемдыше грамот ятыр погынен. Школыш кажне кечын шым меҥгым йолын але велосипед дене коштмо капкылым пеҥгыдемдаш тунам сай шӱкалтышым ыштен, шонем.
Кызыт йӧн лийме семын утларак йолын кошташ тыршем. Пелашем телым ече дене мунчалташ кумылаҥда.
Ик жап кажне эрдене лимфодренажный манме гимнастикым ыштем ыле. Тидлан ондак йолварня вуйыш шогалман, вара эркын таганыш волыман. Тыге 100 гана ыштыман.
Павел ШАКИРОВ, редактор-кусарыше, Россий тӱвыран сулло пашаеҥже:
– Йоча годым эҥер кылмымым веле вученна, да ялысе йоча-влак, тӱшкан погынен, лумым эрыктен-эрыктен, хоккейла модынна. Школышто тунемме жапыште куржталыштме, юношеский разрядемат лийын, футболла модмо. Пакчасаскам коштымо заводышто пашам ыштыме годым заводын сборныйжо верч ече дене куржталыштынам, армийыште куржталаш логалын. Сеҥымаш-влакым пеҥгыдемдыше ятыр грамотем уло.
Тӱвыра пашаеҥ-влакын профсоюзыштын республикысе организацийжын эртарыме таҥасымаштыже «Марий Эл» редакцийын командыж денат, личный результат денат шуко гана сеҥышыш лекме.
Кастене мотор Йошкар-Олана мучко йолын эрташ келша. Телым каныш кечылаште чодыраште ече дене коштам, южгунам садышкат, а тушкыжо шым меҥге лиеш, миен толам.
Спорт тазалыкым пеҥгыдемда, капкылым куштылемда да шоҥгылыкым покташ полша, садлан кеч-могай ийготыштат тудын дене кылым кучыман.
Лидия СЕМЁНОВА, Марий Элын сулло журналистше:
– Морко район Шеҥше школыштына спортзал мемнан тунемме годымат да кызытат кугу, йоҥгыдо, волгыдо. Физкультурым Сергей Александрович ден Иван Акпарсович вӱденыт, школнан лӱмжӧ спортышто чот чапланен. Мыланем баскетболла модаш пеш келшен, командыштат лийынам. Спортивная ходьба дене таҥасымашыш икмыняр гана мияш логалын: тиде пеш оҥай вид – писын ошкылман, но куржаш ок лий, а шиждегече куржын колтет – финиш деч ончыч тыйым кораҥдат! Вара мыланем ӱстембал теннис келшен шинче, районысо таҥасымашке кок-кум гана намиеныт, университетыште тунемме годым ялысе клубышто куанен модам ыле. Кызытат, йӧн лекме годым изи ош шарикетым чон канен перкалем. Икманаш, спортсменжак лийын шуктен омыл, но командылан ала-кунамже сеҥымаш очком кондаш полшенам, шонем.
Шеҥше школым тений районышто ӱстембал теннис дене специализироватлыме площадкылан ойырымо нерген увер, кызытсе школ тренер Евгений Григорьевын пашаже да ӱдыр-рвезе-влакын тӱрлӧ таҥасымаште сеҥымашышт моткоч куандарат.
Алевтина Байкова ямдылен.
Авторын фотожо.




