27 октябрьыште Марий Эл Республикын шымше гана погымо Кугыжаныш Погынжын 31-ше сессийже эртен. Депутат-влак 24 йодышым онченыт.
Икымше кок пунчал дене парламент Йошкар-Оласе судебный районын 1-ше №-ан судебный участкышкыже Юлия Курбангалиевам да 2-шо №-ан судебный участкышкыже Татьяна Лебедевам мировой судья-влаклан пеҥгыдемден.
Депутат-влак Обязательный медицине страхованийын территориальный фондшын бюджетшын доход ден роскот ужашлажым 338,5 миллион теҥгелан кугемдыме дене ик йӱкын келшеныт.
Тиде кечын Марий Элын ятыр законжым федеральный документлан келыштарыме. Мутлан, йоча деч отказыше, тудым медицине организацийыште кодышо але эргылыкеш (ӱдырлыкеш) пуаш келшыше граждан-шамыч нерген уверым Социальный обеспеченинийын Единый кугыжаныш информационный системышкыже пурташ нормым ыштыме. Чрезвычайный ситуацийым шижтарыме да кораҥдыме единый кугыжаныш системын территориальный подсистемышкыже калыклан психологический полышым пуымо пашам пуртымо, а республикын бюджетше гыч финансироватлыме пожар охранын подразделенийжын полномочийышкыже – илемлаште пожарым йӧртымӧ пашам.
Сессийыште республиканский законодательствым уэмдыме шот дене тулык да ача-ава ончымо деч посна кодшо йоча-влаклан социально полшымо, муниципальный погым чеклыме нерген законлашке, тыгак пого ден мланде отношенийла дене кылдалтше законодательный актлашке вашталтышым пуртымо.
Документын у редакцийже дене келшышын, тӱҥ да кокла образованийым налше тулык да ача-ава ончымо деч посна кодшо йоча-шамычлан оласе, ола воктенысе да район кӧргысӧ транспортышто (такси деч моло) яра кудалышташ правам пуымо. Тылеч посна нуно идалыклан ик гана илыме верышкышт корнылан тӱлыде миен толын кертыт. Тунемме годым ачажымат-аважымат але улыжат ик аважым (ачажым) йомдарыше 18 ияш марте ийготан йочам общеобразовательный организацийыш налме нерген положенийым посна тӧрлатымаш семын пуртымо – тыгай ӱдыр-рвезе-влак школым тунемын пытарымышт марте кугыжаныш обеспеченийыште лийыт.
Депутат-влак республикын собственностьыштыжо улшо мландыште кушкылым руымо радамым палемдыме шотышто полномочийым Марий Эл правительствылан пуаш пунчалыныт. Тыгак илыме верым чоҥаш мланде участкым яра налаш праван граждан-шамычлан шонымашыштым шукташ сад участке-влакым ойыраш йӧным ыштеныт.
Кугыжаныш Погын «Марий Эл Республик кумдыкышто аттракцион-влакын технический состоянийышт да эксплуатацийышт аланыште региональный кугыжаныш контроль нерген» у законым приниматлен. Тудо контрольын предметшым, пашам организоватлыме да эртарыме радамым палемда. Документ дене келшышын, аттракцион-влакын состоянийыштым тергыше уполномоченный орган ден должностной еҥ-влакын радамыштым Марий Эл правительстве пеҥгыдемда.
Депутат А.Мирбадалевын тӱҥалтышыж почеш Кугыжаныш Погынын Регламентышкыже парламентын торжественный заседанийже, у созывын икымше сессийже, Марий Эл Республикын угыч сайлыме вуйлатышыжын должностьыш шогалмыжлан пӧлеклалтше заседаний, созыв пытыме шотышто мучашлыше сессий годым Россий Федерацийын Кугыжаныш гимнжым чӱктымӧ нерген нормым пуртымо.
Сессийым мучашлыме деч ончыч депутат-шамыч кадр йодышым решитленыт.
Йӱклымӧ почеш, Кугыжаныш Погын председательын шке полномочийжым тӱҥ паша деч кӱрылтде шуктышо алмаштышыжлан Волжский ик мандатан сайлыме округын депутатше, «Единый Россий» фракцийын членже Лариса Яковлевам сайлыме, а тазалык аралтыш, культур да спорт комитетын председательжылан – Михаил Швецовым. У палемдымаш-влак дене келшышынак, Кугыжаныш Погынын президиумжын да комитетше-влакын составышт вашталтын – депутат корпусын пунчалже дене Л.Яковлевам Кугыжаныш Погынын Редакционный комиссийжын составышкыже пуртымо, а социальный вияҥмаш комитетын составышкыже – у депутат М.Родионовым (тудо тений Юл кундем ик мандатан сайлыме окургышто сеҥышыш лектын).
Кугыжаныш Погынын кумло икымше сессийыштыже Марий Эл Республикын 13 законжым да Кугыжаныш Погынын 27 пунчалжым пеҥгыдемдыме.
М.ИВАНОВА
