Пытартыш вич ийыште республикыш толшо турист-влакын чотышт кок пачаш шукемын.
Тидын нерген Марий Элын Туризмым вияҥдыме шотышто агентствыже увертара. Мутлан, кодшо идалыкыште чылаже 1200 тӱжем турист толын каен. Тышеч 504 тӱжемже икшыван еш-влак лийыныт. Тӱшка гыч пелыж наре мемнан дене малашат кодын гын, молышт экскурсант лийыныт. Тӱҥ шотышто уна-влак Татарстан республик, Москва ола, Киров, Нижегородский да Моско областьла гыч толедыныт.
Регионышто турист пашам 11 туроператор ден 93 организаций шуктат. Толшо-влакым вашлийын да сийлен кертше 75 точкына уло. Лу вереже марий калык кочкышым темлат.
Тылеч посна мемнан кундемыште куд санаторий пашам ышта. Турист-влаклан илаш пураш унагудо сынан 83 вер уло. Иканаште 9383 еҥым вашлийын кертыт.
Турист-влакым ужатен кошташ 130 еҥ экскурсовод семын аттестацийым эртен. Иктыже англичан йылмым пала.
Ты сферым вияҥдымаште Марий Эл Россий кӱкшытан рейтинглашкат пура:
«Медиаразведка» проектын данныйже почеш, Российын вич эн сай тур радамышкыже (ТОП-5);
«Яндекс Путешествий»-ын данныйже почеш, Россий мучко кудалышташ лу эн сай у направлений радамыш (ТОП-10).
«Санатории-России.рф» бронирований порталын да ««ТОП-100 российских здравниц» рейтингын данныйышт почеш, кеҥежым канаш йӧным ыштыме шотышто республикысе санаторийна-влак вич эн сай санаторий радамыште улыт.
«От южных морей да полярного края» проект почеш, Шереметьев замок элнан 30 эн сай объект радамышкыже логалын.
Кодшо ийын «Яндекс Путешествий»-ын увертарымыж почеш, Марий Эл Россий мучко коштмо у направленийым темлыше-влакын 10 эн сай регионжо- влак коклаште лийын.
Светлана Носова
Авторын фотожо
