НОВОСТИ Сеҥымаш СПОРТ Туризм Чолгалык

«Йӱдвел коштмаш» чумырен

«Йӱдвел коштмаш» чумырен
14-18 июльышто Йошкар-Ола воктенысе «Корта» ече базыште йӱдвел коштмаш дене (калыкыште тудым эше скандинав коштмаш, маныт) Российын чемпионатше эртен. Тыгайже элыштына икымше гана лийын.
Марий мландыште мастарлыкым ончыкташ Санкт-Петербург ола, Чуваш, Удмурт, Бакортостан республикла, Пермь край, Нижегородский, Свердловск, Самара, Киров областьла гыч латик команде чумырген.
Уна-влакым Марий Элын физический культур, спорт да туризм министрже Лидия Батюкова, йӱдвел коштмаш Федераций ден Россий спорт туризм комитет вуйлатышын алмаштышыже Алексей Тихомиров саламленыт.
– Пытартыш ийлаште Марий Элыште йӱдвел коштмаш палынак илышыш шыҥдаралтеш, ты видлан районлаштат, паша коллективлаштат шукын кумылаҥыт. Регионыштына Российын чемпионатшым эртарыме дене ты видлан вияҥашыже у шӱкалтыш лиеш манын, ӱшанем. Тыгодым южыштлан тыглай веле огыл, а спортын посна видше семын мастарлыкыштым шуараш моткоч сай йӧн, – палемден Лидия Батюкова.
Старт ийготым шотыш налын пуалтын. Тиде вид дене чемпионатым эртараш – пиал. Шокшо таҥасымаш деч вара икымше верыш Санкт-Петербург гыч толшо команде лектын. Кокымшо верыште – Марий Элын сборныйжо. Пьедесталын кумшо верыштыже пошкудо Чуваш республикын командыже лийын. Чылаштымат шокшын саламлена.
— Личный зачётыштат мемнан спортсменна-шамыч ойыртемалтыч. Ксения Мубаракшина кокымшыш, а Вячеслав Демьянов кумшо верыш лектыныт. Икымше верыште Санкт-Петербург гыч тале марафонистка лийын. Йолгорно» рудерын участникше-шамычат, Олеся Алёшкина, Леонид Суворов (тудак скандинав коштмаш дене Марий Элын чемпионжо), Артур Тимофеев, Ирина Лебедева ойыртемалтыныт. Чыла участникым молодец манме шуэш. Скандинав коштмаш спорт туризм федерацийыш пура, — палдарыш Марий Элыште «Йолгорно» скандинав коштмаш рўдерын директоржо Алексей Алексеев. – Тиде чемпионат кышкарыште скандинав коштмаш дене фестиваль эртыш. Тушкат шуко кумылан-влак ушненыт. Эшежым районла гыч лӱмынак концерт программе дене толыныт. Тидыже толшо уна-шамычлан моткоч вучыдымо да оҥай лийын, вет верысе калыкын культурыжым, йӱлажым пален налаш – сай йӧн. Кумылан-влак марий сем почеш кушташат лектыныт. Тидыже таҥасымашлан шкешотан весела да пайрем кумылым пуртен. Икте кумылым волтыш: старт йӱр деч вара пуалте. Сандене участник-шамычлан ночко корно дене ошкылаш перныш. Тидыже садак могай-гынат чаракым ыштен. Эшежым чодыраште шыҥажат витарен.
Алексей Семёнович ты гана судья пашам шуктен, вет писын ошкылмо деч посна эше техникымат шотыш налман.
Ушештарена, Марий Элыште «Йолгорно» скандинав коштмаш рӱдер 2018 ий гыч официально пашам ышта. А «Пойдём ходить по Йошке!» клуб – 2014 ий гыч. Вуйлатышыже – Морко кундемын эргыже, кызыт Йошкар-Олаште илыше Алексей Алексеев.
Тений регионыштына Россий кӱкшытан 14 таҥасымаш эртаралтын. Теве ынде эше иктылан шукырак.
10 сентябрьыште скандинав коштмаш дене Марий Элын чемпионатше лиеш. Тушко районла гычат кумылан команде-влакым пагален ӱжыт.
Е.Эшкинина.

Опубликовать в Одноклассники

Добавить комментарий