Сарын участникше, ветеран Пётр Афанасьевич Щербаковым Сеҥымаш кече дене саламлаш 21-ше №ан кадет школын тунемшыже, Йошкар-Оласе тӱвыра да каныме рӱдӧ паркын фронтовой бригадыже, Йошкар-Ола администраций вуйлатыше, министерстве ден ведомствын еҥже-влак, Российын Геройжо Дамир Шаймардановын аваже Ирина Шаймарданова миеныт.
Пётр Афансьевичлан тений 10 июльышто 101 ий темеш. Кызыт тудо Семёновко селаште ила. Тыгакше ветеран Оршанке районысо Турша ялыште шочын. Изинек колхозышто тыршен. 17 ийым темымеке, Совет Армийыш служитлаш каен. «Катюшалан» боеприпасым шупшыктен, Ервел Европысо эл-влакым немыч тӱшка деч утарымаште кредалын. Сеҥымаш кечым Прагыште вашлийын.
1950 ий марте Вооруженный Вийыште службым шуен. Сар деч вара Галина илыш пелашыжым вашлийын. Ӱдыр ден эргым ончен куштеныт. Сар деч вара Пётр Афанасьевич шофёрлан, бухгалтерлан, туныктышылан, страховой агентлан ыштен. 1977 ийыште Семёновко ялсоветын депутатшат лийын.
Сарыште кредалмыжлан 21 медаль дене палемдалтын. Нунын коклаште «За взятие Будапешта», «За взятие Вены», «За взятие Белгорода», «За победу над Германией», «За боевые заслуги» медаль-влакым ончыкташ лиеш. Эн кугу наградыже – II степенян Отечественный война орден. Кодшо ийын Петр Афанасьевичым «Йошкар-Олан почётан гражданинже» чап лӱм дене палемденыт. Кум уныкан, ныл кугезе уныкан ветеран ешыж дене пырля ила.
Петр Афанасьевич сар жапым шарналтен ойлен, самырык-влаклан калыкнан подвигшым шарнаш да Кугу Сеҥымашым кондышо-влакын ӱшанле тукымжо лияш тыланен.
Саламлаш мийыше кадет-влак ветеран ончылно торжественный марш дене эртеныт. Артист-влак муреныт, куштеныт, пеледышым кучыктеныт.
Авторын фотожо.
