«Марий чодра» национальный парк ончыкылан тӱзатыме паша планым палемден.
Ты планжым регион вуйлатыше Юрий Зайцеват сайлан шотлен да Россий пӱртӱс поянлык, экологий министр Александр Козловат пеҥгыдемден. «Ваштар курык мучко путешествий» экологий маршрутым тӱзатыме пашалан тений «Экологий» национальный проект почеш шийвундо ойыралтеш.
Палемдыме почеш чыла лиеш гын, ты кундем чынжымак эшеат сылнештеш. Шукерте огыл тушто тидлан пӧлеклалтше погынымашат эртен. Паркын пашаеҥже-влак дене вашлияш Псков, Челябинск областьла гыч эксперт, верысе, районысо кучем, тыгак келшен толшо министерстве ден ведомство вуйлатыше-влак миеныт. Ончыкылык лу ияш план почеш, аралыме пӱртӱс кумдыклан нимогай эҥгекым ыштыде, тудым тӱзатат да тидын годымак экологий дене кылдалтше туризмым утларак вияҥден колтышаш улыт. Мемнан регионышто туризмын ты видше таче начарын огыл вияҥеш, калыкыштат йодмашан. Но тидын годымак Марий Элын сылне пӱртӱс объектлашкыже, поснак парк кумдыкышто верланыше Яльчик, Кичиер, Глухое, Мушанъер ер-влакын серышкышт ӧрдыж гыч турист-влак шукынжо шке гыч «шолып» канаш толын коштыт. Санторий-влак пеленысе йолын коштмо корныламат шотыш кондыман. Национальный паркыш пураш правам пуышо билетым налмат канаш толшо-влакым тушто шот дене кучаш кӱлмым ушештарышаш.
«Марий чодра» национальный паркын ончыкылан вияҥме планжым саемдымашке республикын Пӱртӱс поянлык, экологий да йырым-йырысе средам аралыме шотышто, Спорт да туризм министерстве-влакат ушненыт. Нуно ты пашаш республикыште илыше калыкымат ушнаш йодыт. Тидлан https://vk.cc/cwOPx2 лаштыкыште анонимный анкетрованийым эрташ да marchodra@yandex.ru адресыш шке темлымашым колташ темлат.
Шукерте огыл национальный паркыш Россий Пӱртӱс поянлык да экологий министерствын Росзаповедрӱдержын «Сохранение биологического разнообразия, развитие экологического туризма» федерал проектын проект офисшым вуйлатыше Людмила Поплавская толын коштын (снимкыште). Тудын палемдымыж почеш, паркысе инфраструктурым жап ден келшышын олмыктыманак. Тӱзатен шындыме объект-влак – тиде кеч-могай кумдыкын визитный картычкыже. Вес ийын «Экологий» нацпроект дене келшышын парклан шийвундо полыш кугурак лиеш манын ӱшан уло.
С.Носова
Фотом паркын соцлаштыкше гыч налме.
