Кӱвар
Вашке ямде лиеш
Параньга районышто Элнет эҥер гоч кӱварым капитально олмыктымо паша умбакыже шуйна.
Тачысе кечылан тудо 85 процентлан ямде. «Мостремстрой» АО-н специалистше-влак сооруженийым нӧлтымӧ тӱҥ пашам мучашленыт, пылдыр авыртышым ыштеныт, кӱвар конструкцийым чиялтен пытарат, асфальтым шараш ямдылат.
Кызытеш эҥер гоч жаплан ыштыме кӱвар дене, санденак улыжат 50 километр марте писылык дене кудалыштыт. А олмыктымо кӱварын кужытшо 48 метр утла лиеш. Пашам сентябрь мучаш марте ыштен шукташ палемдыме.
Марий Элна сӧрал пӱртӱсшӧ да вӱдерлан поян улмыж дене ойыртемалтеш. Кундемыштына 500 утла эҥер верланен. Нунын гоч кӱварым эреак шотышто кучымылан кӧра транспорт дене кудалышташ ӱшанле да лӱдыкшыдымӧ.
Параньга районышто нацпроектлам илышыш пуртымо ийлаште 85 метр утла кужыт кӱварым нормативлан келшышын олмыктымо.
Юрий ИСАКОВ.
Снимкыште: Элнет эҥер гоч кӱварым олмыктен пытарат.
Фотом «Марийскавтодор» ГКУ деч налме.
