1 апрельыште Марий Элыште «ГЕРОЙЫН ПЕЛАШЫЖЕ. ГЕРОЙЫН АВАЖЕ» патриотический фотопроект стартым налын.
Тудым Медведево районысо Краснооктябрьский посёлкышто илыше, верысе школышто директорын туныктымо-воспитатлыме паша шотышто алмаштышыже Е.Чемоданова (покшел снимкыште) вуйлата. Елена Ивановна шкежат проектыш ушнен, тудо 2022 ий 3 майыште специальный военный операцийыште боевой задачым шуктымо годым вуйым пыштыше, Мужество орден дене палемдалтше (колымекше) ВДВ-ын гвардий сержантше Павел Чемодановын аваже.
Икымше фотосъёмкыш республикыштына илыше 10 ӱдырамаш: СВО-што лӱддымын кредалше да шочмо эл верч вуйым пыштыше герой-шамычын пелашышт, авашт, ака-шӱжарышт – толыныт.
Тыгай съёмко эше 8 да 23 апрельыште лиеш. Проектыш чыла ӱдырамаш: СВО-што участвоватлыше военнослужащий, мобилизоватлыме граждан, доброволец-влакын, тыгак боевой действий-шамычын ветераныштын пелашышт, авашт, ака-шӱжарышт, йочашт ушнен кертыт. Фотосъёмкыш мияш шонымым ВКонтакте социальный кылыште Елена Ивановналан (*id60010813) возыман.
Ушештарена: «ГЕРОЙЫН ПЕЛАШЫЖЕ. ГЕРОЙЫН АВАЖЕ» фотопроект 2-шо гвардейский армийын командующийжын пелашыже Екатерина Колотовкинан тӱҥалтышыж дене Самара олаште шочын да элнан чыла регионыштыжо вийым налын.
М.ИВАНОВА
А.Котляровын фотожо
