3-5 мартыште «Ваштар курык» санаторийыште республикысе журналист-влакын фестивальышт эртыш. Тушко мыят уло кумылын ушнышым.
Икымше кечын чыланат рӱжге Ужар памаш деке куржын волышна. Мемнан коклаште эн талыже, паледа, кӧ лие? Конешне, «Марий Эл» газетын журналистше! Тиде – Алевтина Байкова! Тудым пӧлек дене палемдышт.
Журналист-влак кокла гыч южыжо икымше гана веле тышке толын, а мый ты кундемыште ятыр гана лийынам. Ужар памаш вӱдым ончен лекмеке, Элнет эҥерым деке волышна. Тышке верысе калык йӱштылаш, яндар вӱдым налаш эреак коштеш. Йырваш пеш мотор вер: памаш вӱд, чодыра… А могай тымык, ласка! Тыгайже тетла нигуштат уке манын шоналтет.
Кокымшо кечын кумдан палыме атаман Емельян Пугачёвын тумыж деке ече дене тарванышна. Тудыжо санаторий деч иктаж 3,5 км тораште верланен, сандене ече дене каенна. Лум ночко, тудо ечыш пижеш гынат, уло вийым поген, миен шуынна. Емельян Пугачёвын тумыжо Россий кӱкшытан пӱртӱс памятниклан шотлалтеш да тудлан – 423 ий. Шке семын мыят ты патыр пушеҥге деч тазалыкым, вий-куатым йодым…
Каласыман, чыла тиде мотор вершӧр «Марий Чодра» национальный паркышке пура, сандене тыште илыш шолеш. Ече дене эртымына годым кугу кисан мурымыжат пылышлан солныш, шиште-влакын кукшо пушеҥгым чӱчкыдын я ик вере, я вес вере перкалымышт шоктыш. Пӱртӱс шке илышыж дене ила. Тумо деке миен шумылан кече лекте да кава кандалгыш, тыге шошо кече кумылнам эшеат нӧлтале.
Ынде теве мӧҥгеш санаторийыш ечыгорнынам такыртена, а ваштарешна Озаҥ гыч хаски пий дене турист-влак вашлиялтыч. Пийже ечыгорно дене корнымат ок пу, сандене эртышыла «Шекланыза! «Черемисский дух леса»! кычкыралаш логале…
Верысе кундемым ончал савырышна, канышна да журналист-влак эше тачысе кечылан ик эн пӱсӧ йодышым каҥашенна. Тиде – районласе газет-влакым ушымо шотышто, пашадар да молат. Черетан тыгай фестивальым тений июньышто эртараш кутырен келшыме.
М.СКОБЕЛЕВ
Авторын фотожо