«Филантроп» тÿнямбал премийлан йодмашым умбакыже налыт. Наградым инвалидностян еҥ-влаклан тÿвыра да сымыктыш аланыште сеҥымашке шумыштлан кучыктат.
Проектым илышыш пуртымо 20 ий жапыште конкурсыш тÿнямбалысе 36 эл да Россий Федерацийын чыла регионжо гыч 10 тÿжем утла еҥ ушнен, 470 участник лауреат лÿмым налын.
2023 ийыште жюри Россий художестве академийын президентше, СССР-ын да РФ-ын калык художникше Зураб Церетелин вуйлатымыж почеш сеҥыше ден лауреат-шамычым ойырен налеш.
Кок ийлан ик гана эртаралтше у конкурслан стартым 2021 ий 3 декабрьыште пуымо. Тудо 2022 ий 31 декабрь марте шуйна.
Конкурсым иктешлыме почеш 2023 ий 17 августышто Москваште Инвалид-влакын всероссийский обществыштлан 35 ий теммым палемдыме пайрем кышкарыште «Филантроп» тÿнямбал премийым кучыктымо XII церемонийым эртарат.
Жюри йодмаш-шамычым кум тÿҥ компетенций дене акла, тиде – исполнительский искусство, изобразительный искусство, литературный творчестве. Конкурсышто участвоватлыше кажне еҥ «Филантроп» тÿнямбал премийын номинантше лÿмым да илыш корнышто вашлиялтше чыла физический ден моральный чаракым сеҥыме нерген сертификат-свидетельствым налеш.
Премийын номинацийже-влак коклаште кокытшо – специальный: «Инвалид-влаклан да нунын мер организацийыштлан чот полшымылан» премийым кугыжаныш але мер пашаеҥлан кучыктат, а «Филантроплан да меценатлан» премийым – инвалид-шамычлан да нунын мер организацийыштлан поро кумыл да спонсор полышым пуышо бизнесъеҥлан.
Конкурсын положенийжым https://www.filantrop.ru/o-premii/ ссылке дене муаш лиеш.
М.ИВАНОВА
