СОЦИАЛ ИЛЫШ

Вашталтыш сай йӧным пуэн

Российын президентше Владимир Путин ава (еш) капиталын программышкыже пуртымо вашталтыш-влакым федеральный закон дене пеҥгыдемден. Нунын дене келшышын, икшыван еш-шамычлан кугыжаныш велым ойырымо оксан суммыжым кугемдыме, ава капиталым кучылтмо, средства дене палынак простан пайдаланыме ятыр у йӧным ыштыме, тыгак программын пашам ыштыме жапшым шуйымо.

…Ынде икымшыланак!

Программыш пуртымо вашталтыш-влак кокла гыч поснак куандарышылан сертификатым 2020 ий 1 январь гыч икымше йочам ыштыше але тудым ашнаш налше ешланак пуымым палемдыман. Капиталлын суммыжо – 466 617 теҥге.

Кокымшо шочшылан – шукырак

2020 ий 1 январь гыч кокымшо йочам ыштыше але тудым ашнаш налше ешлан ава капиталым 150 тӱжем теҥгелан шукырак пуат. Тидын дене келшышын, тудын суммыжо 616 617 теҥге лийын. Икымше кок-кум але тылеч моло йоча шочмо годым элыштына ава капиталын программыжым илышыш пуртымо огыл улмаш гын, 2020 ий 1 январь гыч шочшо але ашнаш налме кумшо, нылымше да тылеч моло икшывылан тыгаяк суммо ойыралтеш.   

2020 ийыште кокымшо йочан лийше да сертификатым налаш йодмашым пуышо еш-влакын капиталышт автоматически 616 617 теҥге марте кугемеш. Программысе вашталтышым пеҥгыдемдыме амал дене Россий Пенсий фондыш угыч толын кошташ огеш кӱл.

Сертификатын кӱлешлыкше уке

Еш ава капиталым писынрак налже, эшеже тудым оформитлаш жапым да вийым ынже йомдаре манын, Пенсий фонд сертификатым апрель кыдал гыч проактивный манме йӧн дене пуаш тӱҥалеш. Тиде мо тыгай? Йоча шочмо деч вара ава капитал автоматически оформитлалтеш, да еш окса дене сертификатым налдеат пайдаланен кертеш. Тидлан мо кӱлешым Пенсий фонд шке ышта.   

Но апрель кыдал марте сертификатым налме нерген йодмашым Россий Пенсий фондын кундемысе виктемышкыже але шуко функциян рӱдерыш пуыман.

Ашнаш налме йочан ешлан сертификатым оформитлыме порядкым ончычсымак кодымо, молан манаш гын эргылыкеш але ӱдырлыкеш налме нерген документым икшывын закон дене пеҥгыдемдыме ачаж ден аваже гына пуэн кертыт.

Кредитым тӱлаш

Вашталтышым пеҥгыдемдыме дене ешлан ава капиталым программын ик эн чӱчкыдын пайдаланыме направленийжылан – илыме йӧным кредит окса кӱшеш саемдымылан – кучылташ палынак йӧнан лийын.  

Тыгодым кредитым ава капитал дене тӱлымӧ нерген йодмашым кредитым налме банкыш пуыман. Икманаш, ынде кок вере – банкыш да Пенсий фондыш – коштмо огеш кӱл, кредитым налме банкыш кредитым але икымше взносым ава капитал дене тӱлымӧ нерген йодмашым пуымо сита. Тиде услуго Россий Пенсий фонд ден банк коклаште келшымашым (соглашенийым) ыштыме деч вара вийым налеш.

Пӧртым – сад участкыште

Программысе вашталтыш ешлан ава капитал кӱшеш илыме пӧртым сад участкыште чоҥаш правам пуэн. Тидланже ончычсо семынак мландылан оза улмым пеҥгыдемдыше документ ден участкыште илыме пӧртым чоҥаш разрешений кӱлыт.

Ава капиталын жапше

Ава (еш) капиталын программыжым вич ийлан шуйымо – 2026 ий мучаш марте. Тиде жапыште шочшан лийше чыла еш ава капитал шотан кугыжаныш полышым налеш.

Россий Пенсий фондын кундемласе органже-влак республикыштына ава капиталын кумдаҥдыме программыжым илышыш пурташ ямде улыт. 2020 ий январь-февральыште Марий Элыште 331 йоча шочын, да нине еш-влак 466 617 теҥге кугыт кугыжаныш полышым налаш праван лийыныт. 2020 ий 1 январь гыч кокымшо йочан лиймылан ава (еш) капиталын сертификатшым налашлан 131 йодмашым пуымо.

М.ИВАНОВА

Опубликовать в Одноклассники

Добавить комментарий