Йошкар-Олаште верланыше Йоча да самырык-влакын усталык полатыште Запорожье кундемысе Розовка посёлко гыч ӱдыр-рвезе-шамычлан мемнан республикысе «Изи пеледыш» калык образцовый ден «Воталинка» калык муро ансамбльлаш коштшо икшыве-влак дене вашлиймаш лийын.
Туныктышо Е.Логинован вуйлатымыж почеш, чыланат совет композитор-шамычын кумдан палыме «Прекрасное далёко», «Дорогою добра», «Вместе весело шагать» да моло мурыштым муреныт. Варажым нуно прикладной искусство мастерскойышто педагог-влак Л.Егошина ден Н.Большова дене пырля бисер гыч «шӱмым» погеныт.
Вашлиймаш мучаште «Воталинка» ансамбльыш коштшо йоча-влак калык муро-шамычым муреныт, тӱрлӧ модышым эртареныт. А чеверласыме годым уна-влакым сюрприз вучен: нунылан «Изи пеледыш» ансамбльыш коштшо ӱдыр-влак дене пырля ыштыме фотографийым кучыктеныт.
Г.Кожевникова
Фотом Марий Эл Образований да науко министерствын сайтше гыч налме
