28 февральыште Марий Элым вуйлатыше Верхневолжский бассейновый округын Бассейновый советшын колымшо, юбилейный, заседанийыштыже участвоватлен.
Александр Евстифеев тиде мероприятийыш погынышо еҥ-влак дене пырля пӱртӱс дене пайдаланыме, вӱд ресурсым аралыме, гидроочистный сооруженийлам чоҥымо пеш кӱлешан йодыш-влакым каҥашен, тыгак советын паша летышыж нерген да шошымсо вӱдшорлан, кеҥежым да шыжым вӱд ташнымылан ямдылалтме нерген форумын учстникше-влакын докладыштым колыштын.
Заседанийым почмыж годым Верхневолжский бассейновый вӱд управленийым вуйлатыше Александр Баринов Марий Элын шумо показательже-влак дене палдарен. Тудо тыге каласен: Бассейновый советын заседанийжым эртарыме вер семын Йошкар-Олам арамлан огыл ойырен налме, республикыште уло молан тунемаш.
Марий Элыште мланде кӧргысӧ поянлык дене шолып пайдаланыме случай лийын огыл, чыла паша пуымо разрешений да законодательстве дене келшышын шуталтеш, каласен Александр Баринов. Тудо докладыштыже вӱд ресурсым сайын шоналтен да переген кучылтмо пример семын адакат вӱдым аралыме кундемлам рашемден палемдыме шумлык республикын пашажым пример семын ончыктен. Вӱдым аралыме кундемлаште кумдык дене пайдаланыме раш пале режим ышталтеш. Моло регионышто тиде пашаште шумо показатель 50-60 процентыш шуэш гын, Марий Элыште тудо 98 процентыш шуын, каласен Бассейновый вӱд управлений вуйлатыше.
Марий Элым вуйлатыше юбилейный заседанийыш погынышо-влакым саламлен ойлен. Республикыште пӱртӱсым, эҥер ден ерлам арален кодышаш да яндарлыкыште кучышаш верч эреак чот тыршат, каласен тудо. Александр Евстифеев вӱдым эрыктыме сооружений-влакын пашаштлан поснак кугу тӱткышым ойырен. Йӱмӧ вӱдын качествыжым саемдыме пашам элын президентше «майысе указыштыже» 2024 ий марте жаплан национальный цель да элым вияҥдыме стратегический задаче-влак радамыш пуртен, тидыже республикыште пашам ыштыме пеш кӱлешан корнылан шотлалтеш.
2019 ий гыч тўҥалын, ме «Юлым тазаҥдымаш» региональный проект дене келшышын, Юлыш йоктарен колтымо вӱдым эрыктыме сооруженийлам уэмдаш тўҥалына, тидын годым кызытсе жаплан келшыше технологийым кучылтына. Тиде проектым шуктышашлан 2019-2024 ийлаште 2 миллиард утла теҥгем, тидын шотыштак федеральный бюджет гыч 1,9 миллиард теҥгем, кучылтына, палемден Александр Евстифеев.
Верхневолжский бассейновый вӱд управленийым вуйлатыше докладыштыже республикын правительствыжын эрыктыше сооруженийлам ыштыме да уэмдыме шотышто пашажым кӱкшын аклен.
Заседанийыште Чебоксар ГЭС-ыште вӱдын уровеньжым нӧлталме дене кылдалтше ӱчашымаш да лукмо пунчал-влак шотыштат уэш ойленыт.
Александр Евстифеевын ты йодыш шотышто шонымашыже раш: республик вӱд кӱкшытым нӧлталме ваштареш шога, молан манаш гын, вӱдын кӱкшытшым нӧлталмаш ялозанлыклан пеш кугу эҥгекым конда. Вӱдын кӱкшытшым нӧлталытак гын, Курыкмарий ден Юрино районлаше шурным шочыктен кертше эн чапле мландым йомдарена, Медведево район марте мланде купаҥын кертеш, каласен республикым вуйлатыше.
Заседанийыш погынышо-влак вӱд ресурсым кучылтмо да аралыме, тидын шотыштак эҥер-влакын серыштым пеҥгыдемдыме дене кылдалтше эше ятыр темым тарватеныт.
Марий Эл Республикым Вуйлатышын организаций да аналитике виктемжын уверже негызеш П.Шакиров ямдылен.
