Медведево районысо Пӱкшерме ялысе тӱвыра пӧрт пеленысе «Весела кумыл» фольклор ансамбль Архангельскыште эртаралтше «Гармоничная Россия» фестивальыш миен коштын.
Российын кечыжлан да олан 440 ияш лӱмгечыжлан пӧлеклалтше мероприятийыш элнан ятыр регионжо гыч усталык коллектив-влак погыненыт.
– Фестивальыште балалайке, гармонь, тӱмыр почеш Медведево да Шернур вел мурым муренна, – каласкала ансамбльын хормейстерже Юлия Соломина. – Чылаже кум концертыште мастарлыкым ончыктенна. Марий куштымашнамат пеш шокшын вашлийыныт. Тусо калыклан вургемнат чот келшен, эсогыл урвалтынам савырен-савырен кучен онченыт. Мемнан коллектив гыч гармонист ден когыньнам верысе телевиденийыш ӱжыныт ыле. Туштат марий калык, тӱвырана нерген каласкалышна, муралтышна.
Марий артист-влак Архангельскыш самолёт дене чоҥештеныт да поезд дене пӧртылыныт.
– Чапле унагудышто иленна, моткоч сайын ончен колтеныт. Тудо олаште кызыт «ош йӱд», – ешарыш Юлия Ивановна. – Северодвинск олаште, Ош теҥыз воктенысе Ягры отрошто лийынна. Вӱдшӧ шокшо, ошын-ошын коеш. Мемнам чыла вереат пеш шокшын вашлийыныт, пеленна тавалташат шукын лектыныт. Организатор-влаклан пеш кугу тау, тиде вашлиймаш кужу жаплан шарнаш кодеш.
А.Байкова
Фотом ансамбльын альбомжо гыч налме.
