Всероссийский переписьын икымше лу кечыштыже кундемыштына 35 процент калык тудым эртен.
Кодшо кушкыжмын Марий Элыште Калык переписьым ямдылен да эртарен колтымо шотышто республиканский комиссийын черетан заседанийже эртен. Тудым Марий Эл правительстве председательын икымше алмаштышыже Михаил Васютин вӱден. Южо районышто эсогыл 50 процентышкат шуын. Маристат вуйлатышын пашажым жаплан шуктышо Инна Петрован ойлымыж почеш, чылаже регионышто 237 тӱжем еҥым, а тиде 34,8 процент лиеш, возен налме. Муниципал районлаште перепись анкетын йодышыжо-шамычлан эн шукын Параньгаште (75%), Марий Турек ыште(60 %), У Торъялыште (58,6 %) да Килемарыште (57,9 %) вашештеныт.
У коронавирус инфекций шарлымылан утларак ямде улмо режимымым пуртымылан верч переписьым эртарыме шотышто нелылык уло. Поснак персоналым ситарыме йодыш Йошкар-Олаште пӱсын шога, ончыч конышо ,вара отказыше-шамычат улыт. Но чыла йодышым оласе мэрий дене пырля вигак шотыш кондаш тыршат. Переписчик ден контролёр-влак кажне арнян ПЦР-тестированийым эртат.
Республикын Связь да информатизаций департаментше дене пырля Маристат кажне арнян «Госуслуги» портал гоч переписьым эртыше-влак нерген уверым рашемда. Мониторингын данныйже почеш, икымше лу кечыште 42,5 процент (100555 граждан) тудым эртен. Инна Петрова эше ик гана пеҥгыдемден, ты портал гоч перписьым эрташ – эн сай йӧн.
QR-кодым илышыш пуртымылан кӧра, еҥ-влаклан переписьыш ушнаш йӧнанрак лийже манын, Михаил Васютин переписной стационар участкылам ужалыме рудерла ден учрежденийлаште охране ден вахте пеленак организоватлаш темлен. Переписьын кӱлешлыкшым палемден, тудын кузерак эртымыж шотышто мониторингат чӱчкыдын лийшаш. А неле йодыш лекмеке, тудым вигак кораҥдыман, каласен Марий Эл правительстве председательын икымше алмаштышыже.
Марий Эл вуйлатышын организаций да
аналитике виктемжын уверже негызеш
С.Носова ямдылен