Марий Эл Республик Запорожский областьысе Куйбышев районым уэмден чоҥаш полша.
Регион вуйлатыше Юрий Зайцев Россий Федераций правительстве председательын алмаштышыже Марат Хуснуллинын видеоконференций кыл йӧн дене эртарыме совещанийышкыже ушнен.
Тушто Донецк ден Луганск Калык Республиклаште, Херсон ден Запорожье областьлаште Россий Федерацийын субъектше-влаклан пеҥгыдемдыме илемлаште уэмден чоҥаш кӱлмӧ объектлаште паша кузе кайыме нерген мутланеныт.
Шефствыш налме районлан Марий Эл кызытат полша. Тушто шинчымашым пуымо, вӱдым ситарыме, тазалыкым аралыме объектлаште паша кая. Куйбышев районыш специальный техникым наҥгайыме, 90 тонн утла чоҥымо материалым да оборудованийым колтымо. Шефский полыш семын йӱшаш вӱдым, районысо библиотеке ден учрежденийлашке книгам, школлашке да дошкольный учрежденийлашке кӱмыж-совлам, ате-кӱмыжым, самырык-влакын рӱдерыштлан мебельым да оргтехникым колтымо.
Марий Эл Республикым вуйлатышын пресс-службыжын уверже негызеш Л.Камалетдинова ямдылен
Д.Речкинын фотожо
