Марий Турек кундемыште – кок школым
«Молодёжь да йоча-влак» нацпроект почеш Марий Турек районышто кок тунемме верым капитально олмыктат.
Тиде Марий Турек кыдалаш ден Мариец посёлкысо школ-влак.
Эртыше кечылаште Марий Эл образований да науко министр Лариса Ревуцкая Марий Турек кыдалаш школышто лийын, олмыктымо пашам ыштымым терген. Тунемме верын тӱҥалтыш школыштыжо палемдыме сомылым 74 процентлан шуктымо: тӱжвал пырдыжым шотыш кондымо, шокшым пуымо, вӱд, электротул системылам уэмдыме, окна-шамычым вашталтыме. Кызыт чоҥышо-влак пӧлем-влакын кӧргыштышт тыршат.
Тунемме верын кыдалаш школыштыжо олмыктымо паша 60 процентлан ямде. Тыгак шокшым пуымо, вӱд да моло системылам шотыш кондымо, тошкалтыш кумдыклам, леведышым да молымат уэмдыме. Кызыт электротул дене кылдалтше пашам ыштат, пӧлемлаште тыршат.
Школ-влакым капитально олмыктымаш палемдыме график почеш кая, тений 1 сентябрьыште нуно омсаштым почшаш улыт.
Техникум ден тӱшкагудым
«Молодёжь да йоча-влак» нацпроект почешак республикысе кок техникум ден тӱшкагудым уэмден олмыктат.
Нуным уэмдаш амалжат кугу: тений Йошкар-Оласе строительный ден Автодорожный техникумлаште чоҥымо да корно отрасль-влаклан «Профессионалитетын» кластерже-шамычым почаш палемдыме.
Йошкар-Оласе строительный техникумышто тыгак тӱшкагудо уэмдалтеш. Кызыт тушто пу окнам пластиканлан вашталтыме, кухньылаш, мушкылтмо пӧлемлаш керамике плиткым келыштарыме, инженер системым монтироватлыме, пырдыжыш штукатуркым пыштыме да молымат ыштыме. Паша тений 31 июльышто мучашлалтшаш.
Автодорожный техникумышто тиде кечылаште тунемме ден общественно-бытовой корпуслам, леведышым, пӧлем-шамычым, инженер сетьым, окнам да омсам уэмдат.
Г.Кожевникова
Фотом Марий Эл Образований да науко министерствын соцкылысе лаштыкше гыч налме
