«Образований» национальный проектын «Образованийын школ системыжым уэмден вияҥдымаш» федеральный программе почеш республикысе общеобразовательный организацийлам черетан у тунемме ийлан ямдылыме паша кеҥеж каныш мучко ышталтеш. 2022-2023-шо ийлаште кундемыштына верланыше 19 школым капитально олмыктымо гын, тений тыгай программыш кудытым пуртымо.
Тиде – Звенигово район Красногорский посёлкысо 1-ше, Медведево район Руэм, Килемар район Церкысола, Волжский район Пӧтъял да Козьмодемьянскысе 3-шо №-ан школ-влак. Палемдыме тунемме верлаште олмыктымо паша умбакыже шуйна да эркын дене мучашке лишемеш. Тыгак лийшаш, вет 1 сентябрь марте тылзе наре жапат кодын огыл.
Марий Эл Образований да науко министерствын увертарымыж почеш, нине общеобразовательный организацийлам капитально олмыкташ федеральный бюджет гыч чылаже 600 утла миллион да республикысе гыч 130 миллион теҥге окса ойыралтын.
Моло школ-влак шотышто ойлаш гын, кажныштыже «косметический ремонт» манме ышталтын, тыгак кочмыверлам шотыш кондымо. Ты пашалан кок ийыште общеобразовательный организаций-шамычлан чылаже 177 миллион теҥге ойыралтын, а йочасад-влаклан 300 миллион утла.
Ушештарена, тений Йошкар-Олаште у школ чоҥалтын. «Восточный» микрорайонысо 32-шо №-ан общеобразовательный организаций шке омсажым тений сентябрьыште почшаш. Тидын деч посна тений шошым Медведево районысо Руэм кыдалаш школын у блокшым чоҥаш тӱҥалме, тудат тенийлан ямде лийшаш.
Тиде кечылаште Марий Элым вуйлатышын кӱштымашыже почеш республик правительстве председательын икымше алмаштышыже Михаил Васютин Козьмодемьянскысе «Дарование» интернат-школыш миен. Тушто кызыт кочмыверым капитально олмыктат. Подрядный организацийын пашаеҥыштын мутышт почеш, ты паша тений ноябрь мучашлан шукталтеш. Тыгак Михаил Зиновьевич оласе 3-шо №-ан школым капитально олмыктымо пашам терген. Тиде тунемме вер республикыштына ик эн кугулан шотлалтеш, сандене тудын кӱлешлыкшат тыгаяк.
Марий Эл образований да науко министр Лариса Ревуцкая тиде кечылаште Звенигово кундемысе икмыняр тунемме верыште да йочасадыште лийын. Кызыт Красногорский посёлкысо 2-шо №-ан школышто спортзалым уэмден олмыктат, тыштак 1-ше №-ан школым капитально олмыктымо паша умбакыже шуйна. Кокымшыштыжо отоплений системым вашталтыме, ты кечылаште тунемме верын кӧргӧ пӧлемлаштыже отделке паша ышталтеш, кӱварым тӧрлат. Чакмарий кыдалаш школ тений «Пилотдымо авиаций системе-влак» национальный проектыш пурталтын, сандене тудын дене келшышын тушто специализированный класслам ямдыленыт. Звенигово районышто лиймыж годым Лариса Ревуцкая тыгак Звениговысо «Звёздочка», Красногорский посёлкысо «Сказка» йочасадлаште лйиын. Икымшыштыже олмыктымо паша ышталтеш, кокымшыжым капитально олмыкташ ямдылалтыт. Палемдыме объектлам тергымыж деч вара министр граждан-влаклан приёмым эртарен.
Г.Кожевникова
Фотом Марий Эл Образований да науко министерствын сайтше гыч налме
