Йошкар-Ола гыч специальный военный операцийыште участвоватлыше ветеран Дарья Мамаевалан Марий Эл вуйлатыше Юрий Зайцев «За отвагу» медальым кучыктен.
Чолга ӱдыр Йошкар-Оласе 29-ше №-ан школышто кадет классыште тунемын. Изинекак военный патриотизм шӱлышан кушкын, «Гром» военно-патриотический клубыш коштын.
Специальный военный операцийыш шке кумылын каен. Передовойышто тудо связистке лийын. 2022 ий 20 сентябрьым кокымшо шочмо кечыже семын палемда, вет ты кечын тудо колымаш деч утлен.
– Мемнан подразделенийыш 12 ракетым колтеныт. Осколко телефонышкем чоҥештен толын. Лач тидлан кӧра илыше кодынам. Контузий гына лийын, – палемден шкеже.
Дарьялан боец-йолташыже-шамыч изи капан улмыжлан «Кнопка» позывнойым пуэныт.
Специальный военный операцийыште участвоватлыше Дарья Мамаева регионыштына тыгай кӱкшӧ награде дене палемдалтше икымше ветеран-ӱдырамашлан шотлалтеш.
«Сар – ӱдырамаш паша огыл» манме ойым шукын колыныт. Туге гынат, элнан ӱжмыж годым, тале эрге-шамыч веле огыл, ӱдыр-влакат ушнат, лӱддымылыкым ончыктат. Тидым ме историй гыч сайын палена. Теве эше ик кугу пример.
Ӱдырамаш-боец регион вуйлатышын кидше гыч «За отвагу» медальым налмыж годым скромнан ойлен: «Кугыжаныш наградым налаш – кугу чап».
Спецопераций тӱҥалме годым тудо умылен: ӧрдыжеш кодын огеш керт. Чылажымат шонкален, военкоматыш ошкылын, но тудым мӧҥгеш колтеныт. А 2022 ий кеҥежым контрактым подписатлен.
«Подразделенийлаште кылым ыштенна», – ойлен ӱдыр. Эксперт-влакын палемдымышт почеш, Дашам юзо вий арален коден. А такшым тудым тыглай смартфон утарен.
Мероприятий деч ончыч воин-влаклан Йошкар-Оласе «Герои» Отечества» тоштер-патриотике рӱдерыште экскурсийым эртареныт.
– Тау тыланда порысым ӱшанлын шуктымыланда, элнан чапшым кӱшнӧ кучымыланда! Ме тендан дене кугешнена, – ойлен Юрий Зайцев.
– Элна шке Геройжо-влак дене кугешнымым ты мероприятий пеҥгыдемден, – ойленыт боец-влак.
– Те патырлыкым, героизмым ончыктенда, – ешарен «Защитники Отечества» кугыжаныш фондын регионысо филиалжым вуйлатыше Ренат Магсумов.
Елена Эшкинина
