Марий Турек район Семёновко ялым тыге Семён лӱман пӧръеҥ лӱмден манын ойлат. Теве мый тудын уремже дене ошкылам. Ятыр сурт тоштемын, шукыштым кудалтен коденыт. Пеҥгыде асфальт корно уке гаяк. Мо ӧрыктарыш: уло яллан ик еҥын гына саварже уло. Тудыжо – Шамиль Муртазинын. Суртшо тураште йоча-влак лачак мече дене модыныт. Икмыняр жап гыч кудывечыш суртоза лекте.
– Ялыштына удмурт, марий, татар, руш калык гыч еҥ-влак илат, – ойла Шамиль. – Чынжым гын, удмурт яллан шотлалтеш. Мый татар улам гынат, одо йылмым палем. Шке жапыштыже тыште кум ферме лийын, презым онченыт. Тунемаш Талый Ключ кандаш классан школыш коштынам, вара Хлебниково школым тунем пытаренам, а умбакыже водитель профессийым Вечын СПТУ-што налынам. Корно уке ыле. Мый Хлебниково аэропорт гыч Йошкар-Олаш самолёт дене чоҥештылынам… Кызыт ме Марий Турек посёлко марте Лом ял гоч автомашина дене кудалыштына. Пасу корно дене йӱран годым каяш ок лий, а тенийже тудым тӧрлатенат огытыл, но телымже эре эрыктат.
Пӧръеҥын мутшо почеш, ялыште тӱҥ шотышто пенсионер-влак илат.
Шке жапыштыже Шамиль Киров лӱмеш совхозышто водительлан пашам ыштен.
Ялыште лиймем годым тудын мучашыштыже Кугу Мосаран трактористше-влак мландым куралыныт. Мутланен ошкылмына годым мӱкшат пӱшкылын шуктыш…. Суртшо тыште иктаж коло наре уло, кеҥежлан даче семын кучышо оза-влак Озаҥ, Ижевск олала гыч толыт.
– Мый олаште 40 ий иленам, ынде шочмо-кушмо верышкак пӧртылынам, Паледа, мемнан изи ял гыч, манаш веле – вич еҥ специальный военный операцийыште кредалеш, иктыжын ӱмыржӧ кӱрылтын. Ял пыта, калык шагалемеш… – каласыш корныштына вашлиялтше Василий Сапаров.
М.СКОБЕЛЕВ
Авторын фотожо.
