Марий Элым вуйлатыше Юрий Зайцев регион-влакым науко да технологий могырым вияҥдыме дене кылдалтше йодыш-влаклан пӧлеклалтше заседанийыште лийын. Тудым Юл кундем федерал округышто Россий президентын полномочный представительже Игорь Комаров эртарен.
Тушто Россий Федераций правительстве председательын алмаштышыже Дмитрий Чернышенко, кучемын федеральный органже-влакым вуйлатыше ден Юл кундем федеральный округын регионлаштыже кугу должностьышто пашам ыштыше-шамыч, научный да мер организаций-влакын еҥышт лийыныт.
Игорь Комаров палемден: элнан лӱдыкшыдымылыкшӧ да вияҥмыже ӱшанле у технологий да науко негыз дене кылдалтыныт. Россий Федераций президентын кӱштымашыже дене келшышын 2030 ий марте да варажым 2036 ий марте мемнан эл технологий могырым лидер лийшаш. Полпред ты кӱштымашым шукташ могай ошкылым ыштымым ушештарен. Нуныжо тыгай улыт: 2030 ий марте технологийым кучылтмо могырым вияҥме нерген концепцийым приниматлыме, науко да технологий велым вияҥмаш стратегийым пеҥгыдемдыме, ик эн кӱлешан направлений ден технологий-влакым палемдыме.
«Экономикын да обществын йодмашыже-шамычым шукташ да технологий суверенитетын задачыже-влакым сайын решатлаш манын, регионлаште ик тичмаш научно-технологический кумдыкым чын ыштыме паша кызыт эн кӱлешан», – каласен Игорь Комаров.
Марий Элым вуйлатыше палемден: регионысо кучемын задачыже – конкурент лийын кертше сатум ыштен лукташ производство процессым уэмдаш, ты пашаш пырля цифр сервисым шыҥдараш. Юрий Зайцевын мутшо почеш, республикнан предприятийже-влак технологий кӱкшытым кучен пашам ыштат, сату ассортиментым кумдаҥдат, у рынкыш лектыт. Марий Элын вузшо-влакын у разработкыштат конкурент улыт, нуно промышленность, образований, медицине да моло отрасльыш шыҥдаралтыт.
Марий Эл вуйлатышын пресс-службыжын уверже негызеш Г.Кожевникова ямдылен
