Параньга район Усола ялыште тӱвыра пӧртым почыныт.
Марий Эл вуйлатыше Юрий Зайцев 2023 ийыште ты кундемыш миен коштмыж годым тӱвыра пӧртын оралтыжын лӱдыкшӧ улмыжым ужмек, уым чоҥаш кӱлмӧ нерген каласен. А теве ынде тудо ямде.
Тӱвыра пӧртым почмаште Марий Эл правительстве председательын алмаштышыже — тӱвыра, савыктыш да калык-влакын пашашт шотышто министр Константин Иванов лийын.
Тошто оралтым кораҥдаш да уым чоҥаш республикын резерв фондшо гыч 19 миллион теҥге оксам ойыреныт. Ешартыш шийвундым коммуникацийым ышташ да кумдыкым тӱзаташ кучылталтын.
«Единый Россий» партийын «Шочмо кундемын тӱвыраже» федерал проект полшымо дене тӱвыра пӧртыш у оборудованийым, сценылык вургемым да йӧнан пушкыдо пӱкен-влакым налыныт.
Ты культур учрежденийыштак ялысе администраций да книгагудо верланеныт.
– У тӱвыра полат шуко сай шонымашым илышыш пуртымо, тӱрлӧ тукым дене вашлиймашым эртарыме да калыкнан тӱвыра ден йӱла поянлыкыштым аралыме верлан шотлалташ тӱҥалеш манын ӱшанем, – палемден Юрий Зайцев.
Алевтина БАЙКОВА ямдылен
