Параньга район Матародо селаште у почтым почыныт.
Пытартыш жапыште илем койын у сыным налеш. Чылажат тӱрлӧ кугыжаныш программым шыҥдарымылан кӧра. Ончыч верысе школ шке сынжым вашталтен. Вара рӱдӧ уремым электротул дене волгалтареныт. Теве ынде ял калыклан чыла шотыштат жаплан келшыше почтым пӧлекленыт. Кодшо кечылаште тудым торжественно почыныт. Верысе-влакын куаныштым пайлаш да нуным саламлаш Россий Почтын Марий Элысе почто кыл управленийжым вуйлатыше Андрей Виногоров, республикын Цифровой вияҥмаш министерствыжын пӧлка вуйлатышыже Дмитрий Солдатов, Параньга муниципал район вуйлатыше Альфит Ибраев ден район администрацийым вуйлатыше Олег Попов миеныт.
Кодшо ийын ты яле почтышто ыштыше-влак, телым кылмаш огыл манын, тошто пу оралтым коҥгаш олтен ырыкташ тӧченыт. Южгунамже пужо ночко лийынат, ончыч тудым коҥга ӱмбаке оптен, кошташ логалын. Таче тыгай нелылык уке. Писын нӧлтымӧ конструкций йӧнлан эҥертен, оралтым идалык жапыште чоҥен шынденыт. Тӱжвач ончымаште изиракын коеш гынат, кӧргыштыжӧ чылалан вер сита. Тушто ыштышыланат, толшо калыкланат йӧнан лийже манын келыштарыме: у мебельым, лӱдыкшыдымылык системым, компьютер техникым, кондиционерым, мотор шӧрлык-влакым вераҥдыме. Почто пашаеҥын шинчыме вержак мом шога! Оралте ынде электричестве йӧн дене ырыкталтеш. Шокшо санузел кумылым нӧлта, шокшо вӱд уло. Вургемым кудашаш-чияш келыштарыме изи пӧлем, тудыжо интернет кевытла гыч налме сатум чиен ончаш келыштаралтын.
Россий почтын верласе отделенийже-влакым уэмден олмыктымо але угыч нӧлтымӧ паша Россий президент Владимир Путинын кӱштымыж почеш кумшо ий шукталтеш. Марий Элыште тений гына тыгай писын нӧлтымӧ 12 да уэмден олмыктымо 5 почтым Курыкмарий, Килемар, Параньга, Морко, У Торъял, Медведево, Шернур да Советский районлаште пашаш колтымо. «Кодшо ий марте конструкций-влак кӱртньӧ гыч лийыныт гын, тений пашаш колтымо у почто-влак пу гыч нӧлтымӧ улыт. Тидыже шкенан производитель-влаклан полшаш шонымаш дене ышталтын», – палемден Андрей Витальевич.
Россий почтын Марий Элысе управленийжым вуйлатыше-влак уэмдыме почто-влакым торжественно почмылан пӧлеклалтше мероприятийлаш лектын коштыт. Лӱмын ял калык дене вашлийын, нунын шонымаштым, темлымаштым пален налаш тыршат. Мутлан, Матародо почтым пашаш колтымек, шкештак оралте кок могырыш изи кож влакым шынденыт. Ынде верысе администрацийым вуйлатыше Надир Хадиуллин дене пырля чумыр кумдыкшымак тӱзатыме йодышым каҥашат. Почто йыр яра вер ситышын: йоча площадкыланат, олма садланат сита. Марий Элысе почто управлений вуйлатыше полшаш сӧрыш.
Ялысе почто кызытсе жапыште верысе калыкын илышыжым куштылемдаш полшышо ик эн тӱҥ объект манаш лиеш. Тышке газет ден журналлан я пенсийлан веле огыл, компьютер технике, тыгак интернет йӧнлан эҥерташ кӱлешлык лекме годымат толыт. Поснак илалшырак-влаклан йӧнан. У почтышто, мутлан, медицине полышымат налаш лиеш: давленийым, кислородым, температурым висат.
Андрей Витальевичын палемдымыж почеш, республикысе тазалыкым аралыме министр дене верласе почто гоч вашкеполышым ӱжыкташ да врач деке возалташ лийме шотышто мутланымаш лийын.
Эшежым пытартыш жапыште почтышто тӱрлӧ сатум ужалат. Тудыжо федеральный почто полшымо дене регионлаш ятырлан шулдынрак толеш.
Андрей Виногоровын палемдымыж почеш, почто пашам уэмден саемдыме проект почеш, тиде пагытыште Марий Элыште чылаже 40 офисым уэмден олмыктымо але угыч почмо. Кокшайскыште, Куярыште, Семёновкышто почто- влакым олмыктыман. Но нуно ты программыш огыт логал. Кызыт «Госуслуги» порталыштат почто отделений-влакым олмыктымо пашам эртараш кӱлешан кумдык-влаклан йӱклымаш кая. Ойырен налме радамыш республикыште тоштемше 50 офисым пуртымо. Сандене верлаште еҥ-влак шке илемыштым уэмдаш кумылан улыт гын, йӱклымашке ушнышашак улыт.
Светлана Носова
Снимкыште: Матародысо у почтым почмо годым.
Авторын фотожо.
