Чылажымат моштен келыштареныт
Оршанке район Кугэҥер ял пеш мотор верыште шинча. Ял мучаште памаш йоген кая, тыгак изи ер уло. Илем йыр чодыра, мотор куэр кушкын шогалыныт. Ерым лишычрак ончалаш манын, лумым келын волышна. Изи ерыште вӱд йӧршын кылмен огыл, тушечын изи памаш шыргыктен йоген лектеш. Йырваш тымык. Чодыра коклаште киса мура.
Пӱртӱсыштӧ яндар южым шӱлалтымек, ял уремым ончен лекна. Тушто ятыр мотор да чоткыдо сурт шинчалан перныш. Мыланна ял покшелне шоҥго тумо воктене шинчыше шемалге-кӱрен тӱсан пӧрт поснак келшыш. Суртоза Владимир Алметов дене лишкырак палыме лийна.
Владимир Анатольевич шке жапыштыже верысе озанлыкыште шофёрлан ыштен, а пелашыже Надежда Аркадьевна зоотехник лийын. 2001 ийыште верысе «Маяк» озанлыкым панкрутыш луктыныт. Алметовмыт ялыштак кодыныт. Эркын у суртым ышташ пижыныт. Илен-толын, ош кермыч дене ешартыш пӧлемым ыштеныт.
Владимир ик жап школышто кочегарлан, вара пожарный частьыште водительлан тыршен. Алметовмытын мланде пайыштат изи огыл. Тушто шожым, шыдаҥым ӱдат. Шудымат шагал огыл солат. Суртозан автомашинаже, тракторжо, комбайнже, моло тӱрлӧ агрегатше уло. Ачажлан мланде пашаште Станислав эргыже полша. Тудо Йошкар-Ола гыч ялыш ик жаплан толын кая.
Алметовмыт суртыштым моштен келыштареныт. Урем могыр гыч кӱрен тӱсан кермычым, профнастилым, штакетникым кучылтмо. Пластик окнаште окнасергажым ал тӱсан калай дене ыштыме. Пӧртыш пурымаште оҥай тошкалтышым келыштарыме.
Чаманен каласыман, ялыш газым пуртымо огыл, садлан пум шуко ямдылыман. Ял мучко эртыме годым кажне гаяк сурт ончылно кийыше пырням, пу сорымым, шелыштме пугомыля-влаым ужаш перныш. Алметовмытат пум ситышын ямдыленыт. Тудыжым пу левашыште аралат. Тыгак шудо левашышт уло.
Суртоза изи пакчажым, беседкыжым, техникыжым ончыктыш. Чылажымат шот-рат дене ыштыме. Кызыт Алметовмыт вольыкым шагал ашнат, ондак ятыр ӱшкыжым шыллан онченыт. Кызыт ушкалым, чывым, комбым ашнат. Илен лекташ манын, тӱрлӧ йӧным кучылтыт: терысым ужалат, мӱкшым кучат. Мӱкшым кеҥежым уныкашт-влак ончаш полшат. Тыге коча-кова самырык-влакым ял илыш дене палдарат, мланде пашалан туныктат.
Михаил СКОБЕЛЕВ,
Лидия ШАБДАРОВА.
Михаил Скобелевын фотожо.
