КУЧЕМЫШТЕ ОБРАЗОВАНИЙ УВЕР ЙОГЫН

У школым чоҥаш тӱҥалме

Йошкар-Олаште ныл пачашан 110 веран школым чоҥаш тӱҥалме. У тунемме вер рӱдолан «Восточный» микрорайоныштыжо лиеш.

Чоҥымо паша шотышто Марий Элым вуйлатыше Юрий Зайцевлан республикын образований да науко министрже Лариса Ревуцкая каласкален. Тудын мутшо почеш, кызытлан площадкыште свайым кырат.

Вашлиймаш годым тудо тыгак регионышто образованийын школ системыжым уэмден вияҥдыме шотышто программым илышыш пуртымо дене палдарен. 2023 ийыште тидлан 846,8 миллион теҥге кугытан субсидийым ойырымо, тышеч 733,5 миллионым – тунемме верлам капитально олмыкташ, а 113,3 миллионым – туныкташ да воспитанийым пуаш оборудованийым да моло средствам налаш. Тений 18 август марте 12 муниципальный образованийыште 13 школым уэмден олмыкташ палемдыме, тыгодым йоча-влакын тунеммышт огеш кӱрылт, нуно вес вере шинчымашым погат.

Марий Элым вуйлатыше палемден: регионысо правительствын задачыже – йоча-шамычлан сай качестван образованийым налаш йӧным ышташ. «Восточный» ден «Спортивный» микрорайонлаште шуко пачеран пӧрт ятыр чоҥалтын да чоҥалтеш, тушто йочан еш-влак илаш пурат, сандене у школ тушто моткоч кӱлешан. Тунемме верлам капитально олмыктымо паша чыла вере жапыштыже шукталтшаш», – каласен тудо.

Марий Эл Республикым вуйлатышын организаций да аналитике виктемжын уверже-влак негызеш Г.Кожевникова ямдылен.

 

Опубликовать в Одноклассники

Добавить комментарий