Марий Элысе коммерческий огыл организаций-влаклан сай увер уло: 11 апрельыште регионыштына 2024 ийын грант конкурсшо тӱҥалеш, увертара республикын Паша да социальный аралымаш министерствыже.
Грантым республикыштына регистрироватлалтше да социальный йодыш-влакым решатлаш полшымо пашам шуктышо коммерческий огыл организаций-шамыч налын кертыт. Йодмашым https://марийэл.гранты.рф/ платформышто 11 апрель гыч 13 май йотке пуаш лиеш.
Грантын кугытшо – 300 гыч 750 тӱжем теҥге марте. Ойыртем организаций-шамычын регистрироватлалтме жапышт да системныйлан шотлалтше инфраструктур проект-влакым илышыш пуртымышт дене кылдалтын. Грант фондын чумыр суммыжо – 10300000 теҥге.
Конкурсын НКО-операторжо – «Поро Марий Эл» коммерческий огыл организаций-влакым вияҥдыме да калыкын тӱҥалтышыжлан полшымо фонд (https://vk.com/dobromari12).
Грант конкурс Президент грант-влак фондын финанс полышыж дене Марий Эл бюджетын средстваж кӱшеш эрта.
М.ИВАНОВА
