Марий самырык театрым пужен ыштыме паша тӱҥалын. Полатын зданийжым 2024 ий мучаш марте пӱтынек уэмден шуктышаш улыт. Паша «Тӱвыра» национальный проект полшымо дене шукталтеш.
Тидлан чылаже 593 миллион теҥге ойыралтын. Кок ий жапыште театрын тӱжвал могыржым ик стиль дене (йошкар кермыч, ужар леведыш) ыштат, тыгак конструкцийыште ситыдымашым кораҥдаш, леведышым вашталташ палемденыт.
– Ончычсо Курчак театр мылам моткоч шерге да лишыл, тудын архитектуржат ойыртемалтше. Ты зданий шукертсек олмыкталтын огыл, садлан чотак тоштемын. Весымат палемдыман, оралте Курчак театрлан келыштаралтын, Марий самырык театрлан тушто шыгыррак, пашам ышташат вер шагал, садлан коллективын темлымашыжым шотыш налын, тудым уэмден ышташ палемдыме. Мутат уке, мыланна эртыше курымла гыч кодшо поянлыкым кертме семын арален кодаш тыршена, мутлан, паркетым, окна ден люстро-шамычым. Ме ончыко кайышаш да артист-влакын пашаштлан чыла йӧным ыштышаш улына, – кодшо кечылаште Регионым виктарыме рӱдерын эртарыме вияш эфирыштыже каласен республикын тӱвыра, савыктыш да калык-влакын пашашт шотышто министр Константин Иванов.
Пужен ачалыме паша тӱҥалмеке, театрын творческий ужашыже М.Шкетан лӱмеш Марий национальный драме театрыш, а технический пашаеҥже-влак республикын Колыштмо-ончымо документ-влак кугыжаныш архивын ончычсо оралтышкыже кусненыт.
Артист-влакын ик группыжо кызыт Урал кундемыште гастроль дене улыт. Тиддеч ончыч нуно Татарстан Республикыште лийыныт гын, ончыкыжым Екатеринбург олаште да Башкортостан Республикын икмыняр районышкыжо каят. Нуно республикна деч ӧрдыжтӧ илыше марий-влаклан «Кок ватылан ик марий» (пьесын авторжо – Валерий Григорьев) ден «Против кого дружим?» спектакль-влакым да концерт программым ончаш темлат.
– А вес группыжо репетицийыш коштеш. Тудым Мер-политике рӱдерын сценыштыже эртарена да туштак икмыняр спектакльым ончыктенна, – палдарыш театрын художественный вуйлатышыже Олег Иркабаев. – Тыгак артист-влак Йошкар-Оласе да районласе йочасадлашке, школ лагерьысе икшыве-влак деке 25 июнь марте лектын коштыт. Кызыт эше концертлан ямдылалтына, 10 июньышто Параньга район Элпанурышто эртаралтше Пеледыш пайремыште мастарлыкым ончыктена. Отпуск гыч 3 августышто пашаш лекмеке, у тургымлан ямдылалташ тӱҥалына. Тунамже ме Шкетан лӱмеш Марий национальный драме театрыште репетицийым эртарена да туштак модаш тӱҥалына. У тургымым «Чодыра юзо – Овда» спектакль дене почаш шонена. Пьесын авторжо – Геннадий Гордеев, а сценыш лукмаште режиссёр Эрвина Гордеева тырша.
Марий самырык театрын оралтыжым молан вес семын ышташ? Калыкыште тыге ойлышо-влакат лийыныт. Тидын шотышто театрын художественный вуйлатышыже Олег Иркабаев тыгерак палемден:
– Тыште кумдыкат шыгыр, сцене изи, декорацийым аралаш, сторляр, бутафор цех-влаклан пашам ышташ вер огеш сите. Тынар ий ме шыгыремдыме семын «иленна», пашам ыштенна. Мутат уке, тидыже пашам вияҥдарен колташ, сай спектакль-влакым сценыш лукташ чаракым ыштен.
Пожар деч лӱдыкшыдымылык системат тачысе илышын йодмашыжлан келшен огеш тол.
Оралтынам олмыктымеке, ончышо-шамычлан спектакльым тӱҥ сценыштына веле огыл, эше весыштат, изиракыште, модаш йӧн лийшаш. Кугу залыште 230 еҥлан вер уло гын, изиракше 100 верлан келыштаралтеш. Изи сценыште эксперимент сынан спектакль-влакым ончыкташ тӱҥалына.
Олег Геннадьевичын палемдымыж почеш, уэмден олмыктымо оралтыште репетицийым веле огыл, самырык художник-влакын выставкыштым эртараш келшыше кумдык, эше тоштер лийшаш.
Ачалыме пашам шуктымо деч посна театр у да жаплан келшыше оборудований денат пойдаралтшаш, сценын механизмжат вашталтшаш. Икманаш, уэмдыме театрын кумдыкшо кок пачаш кугурак лиеш. А тидыже, мутат уке, сценыш сай качестван постановкым лукташ полша да у шӱлыш дене эшеат тыршен пашам ышташ тарата.
Палемдыман, театрын коллективше идалыкыште 130 наре спектакльым 36 тӱжем еҥлан ончыктен.
А.БАЙКОВА
Авторын фотожо
